إيه الفرق بين العفوية والاندفاع؟: كلامك حضرتك دبش

02/10/2019

الفنانة حنان ترك في فيلم "حب البنات" وهي بتتكلم مع أؤف عبد الباقي قالت له دي مش "صراحة دي وقاحة" ومن بعدها الجملة بقيت مستخدمة كتير جدا، لكن الحقيقة إن عندها حق وكتر خيرها إنها قالت الجملة دي عشان نستخدمها، لإن فيه ناس كتير مابتعرفش تفرق بين الوقاحة والصراحة، أو كونهم يبقوا مندفعين أو يبقوا تلقائيين.

الفرق بين الاندفاع والتلقائية كبير بسبب إننا بنستخدم كلمة الاندفاع للتعبير عن شئ سلبي في حين إن التلقائية معناها إيجابي وفي الغالب بالرغم إن الكلمتين ممكن يدوا نفس المعنى إلا إنهم متضادتين، وفي دماغنا كلن إن الأشخاص التلقائين هما أشخاص كويسة وعندهم كمان القدرة على التعبير بحرية لكن الأشخاص المندفعة هما المتهورين اللي مابيفكروش في الكلام قبل ما يقوله أو الفعل قبل ما يعملوه، وفيه برضه ناس في النص لا هما من التلقائيين ولا هما من المندفعين.

موقع psychologytoday قال إن بالرغم إن الاندفاع والتلقائية معناهم متقارب إلا إن الاندفاع معناه التهور وهو السلوك اللي مالهوش معنى ومحدش بينصح به وبيبقى سلوك غير عقلاني، لكن السلوك التلقائي بيكون سلوك من غير أي جهد أو إصرار ومن غير تخطيط وبيعتمد على الارتجال وبالتالي  ممكن يبقى رد الفعل العفوي أو التلقائي ده عبارة عن ضحك أو تسقيف أو رد عفوي، وفي الغالب النوع ده من ردود الأفعال بيبقى مش محتاج حد يسيطر عليه لإنه غالبا بيبقى بيرجتل أو فاقد الوعي، واللي بيعمل الفعل التلقائي بيبقى مش شايف إن فيه حاجة خطر أو غلط هو بيطلع رد فعله اللي من وجهة نظره وقتها أمان، ومش من المرجح إننا نتكلم عن الأخطار أو المشاكل اللي الشخص هيواجها من التلقائية.

أما الاندفاع فهو عبارة سلوك فيه دوافع سواء عن طريق تحريض من حد أو عن طريق ميل داخلي بيبقى مفاجئ، وبيكون فعل قايم على مشاعر غير مستقرة وبالتالي الاندفاع خطر وبيعرض صاحب الفعل للخطر ومصالحة كمان للخطر، وده السبب اللي بيخلينا نسمع إن ممكن يتطلب من شخص يتصرف بعفوية لكن مايتصرفش باندفاع.

في الحقيقة لما حد بينصح حد إنه يتصرف بتلقائية ده بيساعد الشخص يتكيف أسرع من المجتمعات أو الظروف اللي بتتغير وبيبقى شخص مرن أكتر، بمعنى أوضح إنك لما بتنصح حد يبقى تلقائي أكتر إنت بتقوله بشكل غير مباشر إنه يبقى واثق في نفسه أكتر والثقة دي عشان يقدر يعمل حاجات مناسبة من غير ما يضطر إنه يفكر في كل تفصيلة.

وعلى العكس السلوك الاندفاعي بيخلي الشخص يبقى متسرع ومحدش بيثق فيه بسهولة، وبيتم توصيف الاندفاعية بالمفاجأة واللإرادة، وبيبقى فيه إمكانية كبيرة في الاندفاع للغضب وده اللي بيخلي المفهومين غكس بعض خالص، وفي الاندفاع بيبقى فيه مشاعر بتتحكم في الشخص لما بتطلع بيعمل أفعال تتعارض مع مصلحته.

Comments: