صور.. أضخم فصيلة نسور في العالم: حجمه بيوصل لـ 9 كيلو 

08/10/2019

أكبر طائر أغلبنا شافه في حياته كان الديك الرومي، وهو بالنسبة لنا حجمه كبير فعلا ولما بيتدبح ويتاكل بيكفي عزومات كاملة أو أوبن بوفيه كامل، بس الحقيقة بقى إن فيه كائن حي بيتم تصنيفه من ضمن الطيور حجمه يغلب الديك الرومي بمراحل، هو عبارة عن نسر ولكن النسر ده ضخم فعلا لدرجة بتخوف الناس اللي بيشوفوه أو بيشوفوا صورته لإنك بتحس إنه فخور بنفسه وعنيف ومهيب وتحس إن عنيه بتلمع جدا وإنه بيقولك إنه ممكن يبقى بياكل البني آدمين اللي زيك كده على الفطار.

النسر ده فيه شبه من المخلوقات الخرافية أو الخارقة أو شبه بوكيمون من ناحية تانية أو تحس إنه شبه إنسان بس لابس لبس تنكري في حفلة الهالوين، أو إنك اتعرفت عليه في المنطقة 51، بس هو نسر حقيقي عايش في الغابات الاستوائية.

نوع النسور دي ليها شعبية كبيرة على الإنترنت فمثلا صورة واحدة له على Reddit جابت أكتر من 91ألف و600 ألف في 20 ساعة، ونفس الصورة برضه على موقع Imgur اتشافت تقريبا 120 ألف مرة في نفس المدة الزمنية.

فيه نوعين منه نوع أمريكي ونوع تاني اسمه بابوا، طول جناحاته حوالى 7 قدم و4 بوصات يعني حوالي 224 سم، لكن وزنه بيبقى من 8.5 لـ 20 رطل أو 3.8 كيلو لـ 9 كيلو.

Comments: