هديل حسن: لو عملت "مي" تاني هتكون أجرأ و"سابع جار" عنده فرصة يستمر سنين

03/10/2019

كتبت: نوران عاطف

الأسطورة بتقول إن النجاح في التمثيل هو إنك أما تعمل دور شرير تتكره فعلًا، وأما تعمل حاجة تثير مناقشة وتساؤل، تلاقي ده حصل فعلًا، والمشاهدة مستمرة بنفس النجاح لحد النهاية، حتى لو كانت الضريبة ردود أفعال ممكن نعتبرها هجوم، وهو ده اللي قدر يعمله مسلسل "سابع جار" بقصصه وشخصياته.

من أكتر الشخصيات اللي كانت مثيرة للجدل هي "مي" اللي قدمت نموذج ما بيدعيش النسوية ولا دورها في الأحداث إنها تنادي بالحرية أو تحارب عشانها، هي ببساطة شخصية عندها بالفعل قدر من الحرية يخليها تمارس قناعاتها ووجهة نظرها عن الشكل اللي عايزة حياتها بيه، واللي صادف إنها ضد التيار تمامًا.

بعد حوالي سنة من آخر حلقة لـ"سابع جار" اتكلمنا مع هديل حسن صاحبة شخصية "مي" عشان نعرف هي فين؟ وتأثير ضجة المسلسل لسة موجود في حياتها ولا خلص؟

1- ليه ما كررتيش تجربة التمثيل تاني بعد "سابع جار"؟

كررتها في فيلم قصير مع المخرج شريف البنداري "اسمه الحد الساعة "٥، بس هو الحقيقة انا مديتش التمثيل فرصة حقيقية عشان خايفة اضحي بسنين طويلة في مجال شغلي الأصلي واللي هو أنا ماشية فيه كويس جداً وبحبه..  لكن أنا قررت إن جه الوقت اجرب التمثيل بشكل احترافي واخدت ورشة تمثيل في "نيويورك" وناوية اكمل هنا ونشوف الموضوع هيروح فين.

2- لو هتعملي المسلسل تاني دلوقتي هتعمليه بنفس الشكل ولا هتغيري حاجات؟ لو هتغيري هتبقى إيه الحاجات؟

أنا كنت مكسوفة جداً وأنا بعمل المسلسل وشاكة جداً في قدراتي كممثلة، رغم إن اختيار المخرجات ليا معناه إنهم شافوا حاجة مناسبة للدور، غالبًا لو عملته تاني هكون أجرأ، مع إن شخصية "مي" غير المتفقة مع بيئتها كان لايق عليها إنها ماتكونش جريئة، بس هجرب أبين الشخصية دي من حتة جديدة عليا.

3- خلال السنة دي، سواء من العروض أو التعليقات اللي مازالت بتتقالك، لقيتي نفسك كممثلة اتشافتي إزاي؟ وهل ده مختلف عن الشكل اللي شايفة نفسك بيه؟

انا اتشافت علي إني ممثلة محترفة، وزي ما كنت بقول أنا عمري ما اتعاملت مع نفسي علي هذا الأساس، وهو إحساس حلو جداً إنك تكتشفي إنك بتعرفي تعملي حاجة مكانتش علي بالك والناس تتقبلها بمنتهى الإيجابية كده.

4- إيه المكاسب اللي طلعتي بيها من تجربة "سابع جار" فاضلة معاكي لحد دلوقتي؟ على المستوى العملي والإنساني

علي المستوي العملي أنا بقى معنديش أي مشكلة إني اجرب حاجات جديدة، مش خايفة من الفشل أو من أي أحكام عليا.. على المستوى الشخصي، ثقتي في نفسي زادت وعرفت إني لما بكون في مكان شغل فيه ناس كتير بكون هادية وفي حالي جداً.

5- إيه الصداقات أو العلاقات اللي مازالت مستمرة مع فريق العمل؟

علاقتي بالمخرجات وشوية من الفريق اتطورت وبقة صداقة، أما بالنسبة للممثلين فأنا انبسط جدًا إني اتعرفت عليهم بالطريقة دي لأن تجربة زي المسلسل شالت حواجز كتير بينا خليتنا نتعامل بنوع من الأخوة خصوصاً إن معظمنا لسة جديد.

6- شايفة جزء كمان من المسلسل هيكون كويس أو في مصلحة نجاحه اللي فات؟ وتتخيليه لو حصل يبقى اتجاهه إيه؟ و"مي" تكون فين؟

 المسلسل ده الحقيقة عنده فرصة إنه يستمر سنين واللذيذ إنه ممكن يعمل كده بطرق كتير لأن العمارة والجيران أساس ممكن يتعمل بيه حاجات كتير جداً بعيد عن الشخصيات. 

وبالنسبة لـ"مي" ممكن تسافر أو ترجع تعيش مع أهلها أو تتجوز وتعيش في نفس الشقة أو تأجر الشقة وتبقي تيجي تاخد الإيجار.. الاحتمالات ما بتخلصش لكل الشقق، هوكمان ممكن يتعمل بناس جديدة خالص ويبقي حلو جداً أو يكمل بنفس الناس ويتطور بمشاكل الناس اليومية العادية زي ما كان في الجزء الأول. 

7- في عالم موازي لو هتشتغلي حاجة غير كل الحاجات اللي بتعمليها دلوقتي هتبقى إيه؟

مغنية. وياريت أكون ديڤا كمان.

8- أكتر جزء مفضل ليكي في يومك هو إيه؟

أكتر جزء في يومي بحبه هو الجزء اللي من غير شغل.

9- هل إنتِ من الناس اللي ممكن تعمل أكتر من حاجة، تشتغل في أكتر من مجال في وقت واحد ولا إنتِ من هواة التركيز؟وإيه الحاجة اللي لو تطلبت إنك تسيبي أي نشاط تاني في حياتك وتتفرغيلها هي بس ممكن تقدمي التضحية دي عشانها؟

أنا فعلا بشتغل أكتر من حاجة في نفس الوقت  بس أحب إني أركز، لكن لما الاقي أكتر حاجة أنا مبسوطة فيها، وهي دي الحاجة الوحيدة  اللي غالباً ممكن اتفرغلها تماماً.

10- إمتى الشهرة أزعجتك وإمتى شوفتي إنها مفيدة بأي شكل؟

 الحقيقة أنا حظي حلو، كل الناس اللي بقابلها وعارفين أنا مين كانوا لذاذ جداً ومافيش أي إزعاج.

11- مشروعاتك الجاية إيه؟

ورش تمثيل أكتر عشان أجرب مدارس تمثيل مختلفة واقدر أدخل المجال ده بقلب جامد.

Comments: