١٠علامات إن الكراش فقد اهتمامه بيك وليه ده بيحصل؟

07/10/2019

الانجذاب وبعده الاهتمام، شيء إنساني بسيط بيحصل مع أي حد حتى لو اختلفت طرق التعبير عنه، أو اختلفت مصادره بين إنك تبقى إنت اللي مهتم، أو إنت الشخص اللي فيه حد منجذب له، لكن بيفضل فيه نقطة فاصلة لكن تبقى مدرك لها أيًا كان وضعك، وهي إمتى تعرف إنك لازم توقف، أو إنك تتقبل الرفض أو التغيير كإجابة عادية وممكن تحصل.

من ناحية تانية كلنا ساعات بنكون في المنطقة الرمادية بتاعة إنك شايف شخص كويس ومناسب بس مش عارف إنت منجذب له فعلًا ولالا، أو تبقى مهتم في الأول وبعدين تحس إنك اتغيرت، عشان كده جمعنالك شوية علامات أما تتعمل معاك يبقى الشخص ده مش مهتم بيك أو فقد اهتمام كان موجود، وأما تعملها يبقى الحد ده بردو مش هو الشخص المُنتظر.

1- بيقصر في الكلام، وكل الردود بكلمة أو اتنين بالكتير.

2- مش بيهتم يفضي وقت عشان تخرجوا مع بعض.

3- بيلغي الخطط المشتركة في آخر لحظة.

4- مش بيهتم بأي حاجة بتحطها على السوشيال ميديا.. ودي مش حاجة تافهة، تخيل لو إنت منجذب بحد هتبقى عايز تعرف هو بيفكر فإيه؟ واهتماماته إيه؟

5- إنت دايمًا اللي بتبادر بالكلام معاه، سواء تليفون أو كتابة.

6- بيتجاهلك لوقت طويل، أو بيقطع فجأة من غير مقدمات.

7- مش بيهتم يسمع بتركيز وإنت بتتكلم عن نفسك.

8- ما بيشيرش من قريب أو بعيد لفكرة الخروج في معاد غرامي.

9- بتشوفهم بيقدروا يوفروا وقت واهتمام لناس تانية.

10- مابقاش فيه كلام لطيف بينكوا، ما بقيتوش بتقدروا تضحكوا وتهزروا مع بعض.

في نفس السياق، فقدان الاهتمام ده بيبقى له أسباب، لأن الانجذاب المبدئي مش معناه حب أفلاطوني، سهل إن بعض التصرفات اللي مش لطيفة تغير مسار الأمور، والتصرفات دي زي:

1- إنك تبقى غيور، عصبي، أو متاح زيادة عن اللزوم.

2- إن الطرف التاني يحس إنك مش واضح أو بتلعب بيه.

3- بتتجاهله كتير بإنك ما تردش بسرعة أو تنسى مواعيدكوا.

4- مابقيتش موجود في الأماكن المشتركة اللي كان بيشوفك باستمرار فيها.

5- حس بالإهانة منك من أي تصرف مش مقصود أو نكتة بايخة.

Comments: