٦ حاجات تخليكي ما تقوليش عنهم "كلهم مصطفى أبو حجر"

08/10/2019

عشان تعيش جملة زي "كلهم مصطفى أبو حجر" بعد 15 سنة من عرض الفيلم، يبقى لازم يكون لها استخدام كثيف، ومعنى لمس ناس كتير، وشافوا إنه بيعبر عن وعن حالتهم، وعن تجارب مروا وبيمروا بيها، لكن وعلى الرغم من إن ممكن يكون فيه صفات بتجمع بين نوع أو فصيل واحد، إلا إن التعميم ممكن بيكون فيه افتقار للموضوعية، عشان كده حاولنا نجمع أسباب تخليكي ما تقوليش على الرجالة كلهم وحشين.

1- حطي في اعتبارك أهلك، أصدقاءك، زمايلك، فيه ناس أكيد قدمولك دعم، احترام، أو رفقة كويسة، هما نفسهم في علاقة عاطفية ممكن تقولي عليهم "مصطفى أبو حجر"، ده يخليكي تشوفي الصورة بشكل أكبر، وإن العلاقات هي اللي في الغالب معقدة مش فصيل الرجالة.

2- العلاقات العاطفية، أو الجواز والشراكة، بتبقى رحلة اختيار شخص واحد بس يقدملك احتياجاتك، وزي ما إنتِ بتدوري على ده، الراجل كمان بيدور عليه، ومش شرط تبقي إنتِ الشخص المثالي للشخص المعتقدة إنه مثالي ليكي، ما تحاسبيش حد على توقعاتك.

3- من نفس منطلق النقطة اللي فاتت، تغيير الرأي، وتغير المشاعر مش جريمة، وبيحصل مع الراجل والست، ما ينفعش تشوفي الراجل غدار أو مش كويس عشان بيعمل كده.

4- الهدف من المساواة هو الوصول لمرحلة إن الراجل والست يتقال عليهم إنسان عنده عيوب ومميزات، فكرة تعميم "كلهم وحشين" مش إنصاف للنسوية بأي شكل، هي استمرار في التصنيف على أساس النوع.

5- الرغبة في التغيير، عدم القدرة على الالتزام ناحية شخص واحد، الانجذاب الجنسي للشكل والسعي وراه، كلها حاجات عند الراجل والست لكن المحددات الاجتماعية والنشأة خلت نسبة كبيرة من البنات تطلع على إن الحاجات دي مش ليها وهتتحاسب عليها، لكن الراجل عنده المساحة دي إنه يعبر عن رغباته.

6- رجوعًا لفكرة التوقعات، جزء كبير من اللي منتظراه يتقدملك وربطاه بفكرة الرجولة، زي المصروف، القوة، القدرة السحرية على احتواء المشاكل، النخوة..إلخ هي جزء كبير من المشكلة، لأن فيه ست قوية وست ضعيفة، ست غبية وست ذكية، ست معاها فلوس وست معهاش، نفس الشيء للرجالة، مفيش كتالوج موحد ليهم، بجانب إن فيه صفات مرتبطة بالعادات والتقاليد والشكل الاجتماعي، عشان كده بيحصل "Error" وقت التنفيذ لأن بتبقى أقرب لمحاولة تمثيل القالب الاجتماعي ده لكن مش شرط تبقى هي صفاته الحقيقية.

الموضوع مش هدفه الدفاع عن الرجالة، لكن الوصول لمرحلة من المساواة ماحدش فيها يقول بتعمل كده عشان ست وده مش هيحصل إلا لما ماحدش يقول بيعمل كده عشان راجل.

Comments: