في اليوم العالمي للبريد.. بلاي ليست الجوابات

09/10/2019

تخيل الحياة من غير بريد.. تخيل نفسك في مكان وناس يهموك في مكان تاني بدون أي وسيلة تواصل.. تخيل قد إيه وجود اختراع يوصل بينكوا وإنتوا مش شايفين بعض ممكن يغير حياتك ومسارها.. طب فكر في الكلام اللي ما بتقدرش تقوله لحد في وشه، مشاعرك اللي بتبقى محتاجة تفكير وترتيب، الأوقات اللي بتحس فجأة إنها أنسب وقت تقول اللي في نفسك لحد تاني، فما تلاقيش غير إنك تبعت "رسالة".. حاجات كتير تستحق التخليد، وتستحق إن يكون لها يوم تحتفل بيه بالاختراع اللي وثّق المشاعر، وخلى الود أو الغضب أو الحزن أو الفرح وصول.. عشان كده يوم 9 أكتوبر هو يوم البريد العالمي.

احتفال يعني موسيقى وغنا، عشان كده واحتفالًا بـ"يوم البريد" جمعنا أهم الأغاني اللي اتكلمت عن الجوابات والرسايل.

1- ابعتلي جواب- صباح فخري

قصة الأغنية بتدور حوالين رجاء وطلب واحد من حبيبته إنها تبعت جواب حتى لو كان محتواه عتاب أو غضب، لأن الرسالة اهتمام مهما كان اللي بتقوله!

كلمات: حسام الدين الخطيب

ألحان: بكري الكردي

2- جواب- عبد الحليم حافظ

من الأغاني المختلفة لأن كلماتها عبارة عن كلمات جواب بيقراه واحد لحبيبته، في الفترة الذهبية من العلاقات واللي هي البدايات.

كلمات: عبد الرحمن الأبنودي

ألحان: كمال الطويل

3- البوسطجية اشتكوا- رجاء عبده

تأكيدًا لفكرة إن البريد هو توثيق للحظة عندك حاجة تقولها فيها في غياب الطرف التاني، أغنية رجاء عبده هي تعبير عن شدة تفكير واحدة في حبيبها ورغبتها في توثيق كل مرة فيهم، لدرجة إن "البوسطجية اشتكوا!"

كلمات: أبو السعود الإبياري

ألحان: محمد عبد الوهاب

4- مرسال لحبيبتي- علي الهلباوي

نموذج عصري من أغنية "جواب" لحليم، هي كمان عبارة عن واحد بيقرا محتوى رسالة منه لحبيبته وبيذكر حتى "الشارطة المايلة" و"الفراغ" اللي بين الكلام.

كلمات: أشرف توفيق

ألحان: علي الهلباوي

6- رسالة من تحت الماء- عبد الحليم حافظ

من أشهر أغاني عبد الحليم وأطولها، وهي في الأصل قصيدة للشاعر نزار قباني، بتشبه الوقوع في الحب بالغرق في البحر، وبالتالي فإن الشخص اللي في الحالة دي وبيخاطب حبيبته، هو غرقان وبيكلمها من تحت الميه!

كلمات: نزار قباني

ألحان: محمد الموجي

7- رسالة من امرأة- فايزة أحمد

هي كمان قصيدة في الأقل لـ"نزار" لكن فيها خروج من مرحلة البدايات الوردية، ودخول في الألم والفراق، الأغنية عبارة عن رسالة من واحدة للشخص اللي كانت بتحبه وخانها، بتحكي فيها بالتفصيل عن تصرفاته معاها اللي كان تغطية لوجود واحدة ست تانية معاه، ومشاعرها ناحية الموقف.

كلمات: نزار قباني

ألحان: محمد سلطان

8- باعتلك سلامي- وديع الصافي

هنا الصياغة مختلفة، "وديع" هنا بيقول لحبيبته اللي غايبة إنه هيبعت "حمامة" - واللي هي كانت البريد زمان-  كرسول لسلامه وأسراره عشان يوصلها ويحيكلها ويعرف منها هي كمان أخبارها اللي ممكن تخفف من آلام بعده عنها.

كلمات: مارون كرم

ألحان: عفيف رضوان

9- متى أشوفك- محمد رشدي

الأغنية مش بشكل مباشر بتتكلم عن الجوابات والرسايل، لكن هي بتحكي عن واحد حبيبته غايبة عنه، وبيفكر هيشوفها إمتى؟ ومن وسايل التواصل معاها هي "المراسيل" اللي شايلة شوق وحب.

كلمات: محمد حمزة

ألحان: بليغ حمدي

Comments: