٥ أفكار مبتكرة عشان تنزلوا Date مايتنسيش

10/10/2019

كتير مننا وقت الخريف بيحس برغبة إنه يحب أو يدخل في علاقة، الجو اللطيف مع قرب دخول الشتا، هدوء الشوارع بالليل ونسمة الهوا، لسعة البرد في الأوقات المتأخرة، كل ده بيحسسك - غالبا- إنك عايز حد تسهر ترغي معاه أو تقابله كل يوم، وعشان تعيش خريف حلو دي 8 أفكار لـ Date مختلف مايتنسيش، حتى لو فركشت!

1- خد درس في حاجة مختلفة.. رقص مثلا

طبيعي لو هتـ Date حد يكون في حاجات مشتركة بينكم، اختاروا حاجة بتحبوها إنتوا الاتنين وروحوا خدوا درس أو سيشن فيها، زي الرقص مثلا، سيشن تعليم "تانجو" أو "سالسا" أو غيرهم مع حد معجب بيه هتبقى تجربة حلوة، واستغلوا الوقت اللي بعد الرقص في الكلام والرغي.

2- زوروا متاحف/ أماكن تاريخية

رغم الصورة اللي عند الناس كلها عن المتاحف والأماكن التاريخية إنها بتاعت مثقفين بس، لكن بعض المتاحف والأماكن القديمة المفتوحة بتبقى ممتعة جدا في التجول والمشي والرغي، زي قلعة "صلاح الدين" مثلا أو مقياس النيل اللي في المنيل، الجو بيبقى شاعري مع الإضاءة والهدوء والوسع اللي في المكان، ده غير إن الأماكن دي بالليل ممكن تاخدوا فيها صور حلوة جدا

3- روحوا معرض زهور ونباتات

بغض النظر إنتوا الاتنين ليكوا في الزهور ولا لأ، بس التمشية في مكان كله زهور بألوان مختلفة شيء مريح نفسيا وصحي، استغلوا التمشية في الكلام وإنكم تعرفوا بعض أكتر لو ده أول "ديت"، واسألوا عن أنواع النباتات والزهور واشتروا لو ده متاح في المكان، وجود الشيء ده عندك في البيت هتبقى ذكرى حلوة لليوم ده

4- جولة ديكور

لو بتخطط تعمل أي لمسات مختفلة في أوضتك من باب التغيير أو كسر الملل، استغل وجود شخص جديد في حياتك في إنكم تاخدوا جولة تتفرجوا فيها على أشكال إضاءة مختلفة أو مكان فيه Frames وديكوريشنز بشكل عام زي "أيكيا"، واعرفوا ذوق وتفضيلات بعض في الألوان وستايل المكان اللي تحب تنام/ تشتغل فيه

5- ديت التصوير

خلي هدف الديت هو إن كل طرف يصور التاني صور حلوة، ادرسوا الأماكن اللي حواليكم وشوفوا إيه أكتر أماكن حلوة في التصوير، سواء أماكن عامة أو مفتوحة أو كافيها ومطاعم ديكورها ومودها مختلف، اتفرجوا على صور الأماكن على الإنترنت وروحوا اعملوا "فوتوسيشن"، واتكلموا أثناء التصوير طبعا

Comments: