ملخص جريمة قتل طالب في المنوفية بعد دفاعه عن بنت: الجاني اتقبض عليه

11/10/2019

انتشر من ساعات على كل مواقع التواصل الاجتماعي هاشتاج اسمه راجح قاتل وفيه هاشتاج تاني اسمه إعدام راجح، وده كان بعد جريمة قتل حصلت في مركز تلا في محافظة المنوفية.

في الأول بدأت الحكاية لما محمد أشرف راجح اللي عنده 20 سنة كان بيعاكس بنت، واتدخل محمود البنا اللي عمره حوالي 18 سنة وهو طالب في تانية ثانوي ودافع عن البنت وقال إنه اعتبر البنت اللي دافع عنها دي أخته، وبدأت من هنا المشكلة بين الشابين واتدخل فيها صحاب المتهم محمد راجح، ووصلت المشكلة في الآخر إن المتهم محمد راجح قتل محمود البنا بسلاح أبيض.

تفاصيل الحادثة بدأت في الانتشار بعد ما وصل بلاغ لمحمد ناجي مدير أمن المنوفية، من اللواء محمد عمارة مدير المباحث الجنائية بالمنوفية إن مستشفى تلا المركزي استقبلت محمود البنا جثة هامدة بسبب طعنات في البطن، وبان من التحقيقات إن جريمة القتل حصلت بسبب مشادة كلامية بين الطرفين على القهوة، وقال شهود العيان إن راجح خرج مطواة من هدومه وكان معاه عدد من صحابه على القهوة ومعاه القتيل، واتحول الحوار بينهم مرة واحدة لخناق وجري ورا المجني عليه، وحاول يفلت منهم لكنهم تتبعوه وأصابوه بعدة طعنات موتته.

وكشفت التحقيقات إن محمود البنا كان خارج من درس خصوصي ولقى الجاني بيعاكس البنت وقاله إن ده عيب وتصرف مايليقش بطالب جامعي ولما حصلت المشادة الكلامية بينهم قتل الجاني المجني عليه بـ 3 طعنات في أماكن مختلفة، وبعدها حاول قرايب القاتل إنهم يهربوه لإسكندرية، لكن تم القبض عليه وجاري التحقيق معاه.

وخرجت جنازة كبيرة من بلد المجني عليه في مدينة تلا وردد الأهالي عبارات في الجنة يا شهيد، مع آلاف التغريدات على "تويتر" اللي بتطالب بإعدام القاتل.

Comments: