مشروع "ريم" عشان تعرف النبات المناسب ليك وتعتني بيه إزاي؟

14/10/2019

كتبت: نوران عاطف

في وقت العالم كله بيتجه ناحية صداقة البيئة والمحافظة عليها، خصوصًا مكافحة استخدام البلاستيك والتوعية بأضراره، ظهر كمان اللي عايز ياخد خطوة أكبر لقدام، ويساعد الأرض تتنفس، ورئة الأرض هي الزرع!

ريم السيسي بنت عشرينية، مجال شغلها بعيد كل البعد عن النبات والزرع، لكن شغفها ناحية خلق بيئة خضرا صحية، خلاها تفكر إزاي تزود وعي الناس وتجذب اهتمامهم لتشجير بيوتهم مش بس أراضيهم، وإنهم كمان يحصلوا على الثمار والأعشاب اللازم لهم من زراعتهم.

اتكلمنا مع "ريم" عشان نعرف أكتر عن مشروعها وتفاصيله.

1- عرفينا بنفسك، سنك، بتعملي إيه في حياتك حاليًا؟

ريم السيسي، 29 سنة وبشتغل Planner and Account Manager، في شركة دعاية، بس في الأصل خريجة صيدلة إسكندرية.

2- فكرة المشروع جتلك إزاي؟

أنا اتولدت وعشت في إسكندرية ومعظم طفولتي كنت بقضيها مع جدو في جنينة الساحل، ولما كبرت درست "botany"  في صيدلة وبصراحة كانت أكتر مادة شاداني!

 شوية شوية بعد ما نقلت القاهرة ابتديت أحس إن كل ما بجيب زرع أو نباتات جديدة للبيت، طاقة البيت بتتغير، واتسحلت مع الموضوع لحد ما فهمت أهمية كل نبات وكمان أهمية المكان اللي هيتحط فيه.

 الموضوع بقى بدأ بجد لما الناس بدأت تجيلي وتشوف قد إيه النباتات عاملة روح مختلفة للبيت وبصراحة هما حسوا إني فاهمة وبدأوا يسألوني كلهم نفس الأسئلة زي: أنا نفسي أجيب نبات بس خايف ماعرفش اعتني بيه/ أنا جبت نبات قبل كده ومات مني/ أنا عايز أجيب نبات بس ممكن انت تيجي تجيبهولي..إلخ.

فكرت إنه ليه ما أعملش براند ليا وأبدأ أعلم الناس أكتر عن النباتات وإزاي يعتنوا بيهم، فعملت Account Educational -حساب تعليمي وتوعوي- عن النباتات على "إنستجرام".

3- وهو تفصيلًا عبارة عن إيه؟

ببساطة هو "Jardin" والهدف الأساسي إنه يخليك تدي مساحة للنبات

إحنا بنقدم 3 خدمات:

أولاً: مدونة تعليمية وده من خلاله بنعرّف الناس عن أنواع النباتات وطرق العناية بيهم ومعظم المعلومات اللي هتحتاجها لو هتزرع نباتات.

تاني حاجة: منفذ بيع وده بتقدر تشتري منه أي نبات انت بتدور عليه  لو عندك معلومات عنه، وبرضه بيبقى مع كل نبات التعليمات الخاصة بيه.

تالت حاجة: Plantscaping ودي بتبقى داخلية أو خارجية لأي مكان عاوز تملاه بنباتات أو تعمل ديكور بالكامل بالنباتات.

من الآخر هدفنا نشجع الناس إنها تزرع وتهتم وتعرف أكتر عن النباتات، لأن وجودها هيبقى ليه تأثير كبير على حياتنا وصحتنا والموود العام كل يوم، لإن مثلاً فيه نباتات لتنقية الهوا في البيت ونباتات تانية بتطلع أكسجين بالليل، كلها حاجات راجعة لينا إحنا وبتأثر علينا إيجابيًا.

4- كان عندك اهتمامات من قبل كده مرتبطة بالموضوع؟

البداية كانت بسيطة، شوية تجارب صغيرة وتركيز على  الصبار والنعناع وحاجات صغيرة كده.

5- بدأتي إزاي التنفيذ على أرض الواقع؟

الموضوع ماكانش مترتبله خالص، أنا بعد ما عملت أكونت إنستجرام بدأت تجيلي طلبات وأسئلة كتير، فاتكلمت مع صحابي وكلهم شجعوني إني أبدأ، وطلع اسم "Jardin" من جنينة جدو يعني، وشغلي في مجال الإعلانات سهّل عليا جزء التسويق، واشتغلت معايا عليه ديزاينر صديقة. 

بعدين جاتلي فرصة Plantscaping  مع مكان مشهور في الساحل وبعدها اشتغلت فيلم قصير مع لمياء أمين وكان بطل القصة "صبارة"، وملينا الـset  بنباتات تانية مختلفة. 

ده غير كل صحابي اللي ساعدوني علشان Jardin  يطلع بصورة احترافية تخلي الناس تثق فينا اكتر.

6- كانت إيه العوائق؟

مش هضحك عليكي الموضوع مش سهل تمامًا من ناحية إني بشتغل ساعات طويلة كل يوم، وكمان أنا لوحدي في معظم المشاريع، يعني أنا اللي بعمل كل الشغل على الأرض  وأون لاين، خصوصاً إنه Plastic Free Project فالقوالب كلها فخار مفيش بلاستيك وبنعملها مخصوص لكل نبات وكل مشروع، فالموضوع ماكانش سهل خالص في حتة الأدوات والتوصيل وبنحاول على قد ما نقدر إن التكلفة ماتبقاش غالية علشان الناس تقدر تعمل كده.

7- أقنعتي الناس إزاي بفكرتك؟

يعني بصراحة مش عارفة، بس الناس اللي حواليا شافتني شغالة ومتحمسة جداً فبدأوا يساعدوني وفجأة Jardin  بقت موجودة

و كمان بقيت بشوف الناس محتاجة إيه من أعشاب الطبخ  لحد شجر الليمون والزتون.

8- رد الفعل كان عامل إزاي؟

رد الفعل كان إيجابي أوي أنا ماكنتش حاسة إن الناس هتشاركتي نفس الشغف، بس أعتقد إن الموضوع "مُعدي"، أول ما اللي حواليك بيشوفوا قد إيه إنت متحمس بيتنقلهم كده الإحساس، وعلى قد ما طول الوقت أنا خايفة من الفشل، بس اللي بيحمسني هو رد فعل الناس الإيجابي.

9- المشروع وصل فين دلوقتي؟

بصي هو لحد دلوقتي إحنا في الـ soft launching phase ، يعني باخد طلبات من صحابي وناس أعرفهم بس لسة بظبط الدنيا من ناحية المنتجات اللي الناس محتاجاها و الأدوات والتوصيل، بس خلاص قريب في خلال الشهر ده هنعمل الـ official launch.

10- بتشتركي في معارض أو حاجة زي كده؟

ناوية أشارك في المعارض اللي في القاهرة و كمان في إسكندرية، وأكيد هنعلن عن أي معرض نشارك فيه على حسابنا على إنستجرام.

11- خططك إيه للمشروع؟ بتحلمي يوصل فين؟

أنا فعلاً بس نفسي كل الناس تدي مساحة للنبات، حاطة هدف إن على آخر السنة أكون ساعدت الناس بالمشروع  ده إنها تتبنى فكرة الزرع الطبيعي وأهميته لينا وللبيئة.

كمان ناوية أعمل  فيديوهات تعليمية وورش عمل في أماكن أصلاً بتبيع زرع، حاجة كمان، عايزة أكبّر الـscope وأبدأ أعمل تعاون مع مؤسسات، ونظبط الجناين سواء في الأماكن العامة أو المجمعات السكنية علشان تشجع الناس أكتر على الزراعة والتعود على الخضرة.



 

Comments: