صور وڤيديوهات.. التفاصيل الكاملة لحرايق لبنان

15/10/2019

بدأت خلال الساعات اللي فاتت، وتحديدًا من مساء يوم الاتنين 14 أكتوبر، حرايق في مناطق مختلفة داخل دولة لبنان، بدأت في منطقة الشوف والدبيّة والدامور، وامتدت في تلال منطقة المشرف، مع محاولات من الجهات المختصة للسيطرة على الوضع.

السبب الحقيقي لاندلاع الحريق مازال مش معروف، ولحد دلوقتي ما تمش الإعلان عن أي خساير في الأرواح على الرغم من وجود إصابات في أفراد الدفاع المدني عددهم 4 لكن حالتهم مستقرة، وفي نفس الصدد صرح سعد الحريري رئيس الحكومة  إن" باب التحقيق هيتفتح فورًا في ملابسات الوضع، وإن كل الجهات بلا استثناء شغالة على التعامل مع الموقف، ولو كان الحريق مقصود فلازم هيكون فيه حد هيدفع التمن، ومفيش خساير جسدية لحد دلوقتي والخساير المادية ممكن تعويضها"، وده حسب اللي ذكرته جريدة النهار اللبنانية.

من ناحية تانية اتسببت سرعة الرياح الكبيرة اللي وصلت 50 كم في الساعة، لتوسع انتشار الحريق في وقت قليل وعلى نطاق واسع، اتحاصر بسببه عدد من المواطنين داخل بيوتهم، بالإضافة لبعض المدارس والجامعات اللي تم قفلها النهاردة لحين استقرار الأوضاع، وتزويد الناس اللي رفضت تسيب بيوتها برقم لخط ساخن يتصلوا بيه لو قرب الخطر منهم.

وعن خطوات التعامل مع الحريق أعلنت وزيرة الداخلية ريا الحسن، إن فيه طيارات قبرصية بدأت بالفعل في عملية الإخماد، ولو ما نجحتش في السيطرة الكاملة، هيتم الاستعانة بالاتحاد الأوروبي، وده لأن الطيارات الموجودة في مطار بيروت غير صالحة للاستخدام.


 

Comments: