"أنباء عن خلافات زوجية": أصالة حذفت كل صورها مع زوجها!

15/10/2019


كتب: أحمد شحاتة
اتفاجيء امبارح متابعي المطربة "أصالة نصري" لما دخلوا على حسابها على إنستجرام عشان يشوفوا آخر الحاجات اللي نشرتها فنانتهم المفضلة واكتشفوا بإن عدد الصور نقص، وبعد تركيزهم في الصور اللي كانت موجودة قبل كده واتمسحت لقوا إنها مسحت كل صورها مع زوجها الحالي -على الأقل حتى الآن- المنتج والمخرج طارق العريان، ومن هنا بدأ الكلام عن تعرض أصالة للخيانة الزوجية وانتشرت الأقوال عن إن أصالة طلبت تنفصل عنه.

ورغم إن الخبر ده ظهر أكتر من مرة على مدار آخر 3 سنين، لكن المرة دي الجمهور والصحافة الفنية بدأوا يربطوا الأحداث ببعضها، لإن أصالة بقالها فترة بتكتب بوستات وتغريدات على السوشيال ميديا فيما معناها أنها تعاني من صدمة واكتئاب وتمر بأزمة معينة ما أعلنتش عنها حاجة، لكنها نزلت صورة على إنستجرام بتاريخ 25 سبتمبر وكتبت عليها كلام بيوضح الحالة اللي بتمر بيها من حيرة وقلق وتردد بكلمات صادمة زي "شعوري تائه بين المتناقضات، يتخبّط ويعلو ويقع على أرضٍ قاسية خشنه، يتألّم حتّى يصل الألم قلبي، وروحي ترى فيما أقوله سخفاً، فكيف يعبّر الكلام عنّ هذا العالم الكبير بداخلي، فيني بحار وجبال وسهول ومدن، كلّها تداخلت ببعضها بعضاً، حتّى أصبحتُ غير قادرة على فصلها، أنا لستُ على مايرام"

وغياب طارق العريان عن مرافقته ليها في حفلها الأخير في الرياض كان نقطة استفهام أخرى، لإنه كان بيرافقها في كل المناسبات والحفلات اللي بتعملها خاصة اللي بتبقى برا مصر، لكنه ما ظهرش معاها واللي كان معاها هو أخوها ومدير أعمالها أنس نصري، وده اللي خلى جمهورها يشك أكتر، بس شك الجمهور زاد لما بعض المواقع العربية المهتمة بالمجال الفني نشرت أخبار نقلاً عن مصادر قريبة لأصالة ومصادر في المجال الفني إن أصالة طلبت الانفصال عن طارق العريان بسبب الخيانة الزوجية، وإن اللي بيخونها معاها هي فنانة عربية شابة لسه ماحدش أعلن عن هويتها.

لو نرجع كام سنة ورا، هنفتكر قد إيه علاقتهم كانت ظاهرة في وسائل الإعلام بإنها كويسة، وإن أصالة في كل ظهور تلفزيوني ليها كانت بتشكر فيه وبتتكلم بحب عن علاقتهم ودايماً بتوصفه بالشخص اللي أنقذها وأنقذ حياتها من الأزمات اللي كانت فيها قبل ماتعرفه، وأغنية "هو حبيبي" اللي تعتبر من أشهر أغانيها كانت إهداء خاص له وحتى كمان ظهر معاها على غلاف الأغنية.

لكن كان فيه تصريح مستخبي مر مرور الكرام من 3 سنين لأصالة أثناء مداخلة ليها مع إذاعة "صوت الغد"، قالت إنها "بتفكرأحياناً بالانفصال عن زوجها لكنها تعود وتغير رأيها"، من غير ماتوضح الأسباب اللي كانت بتخليها عايزه تنفصل، لكن في نفس المدة الزمنية دي برضو كانت بداية انتشار الأخبار في الصحافة عن تعرضها للخيانة.

لو ثبت الكلام ده فعلاً في الأيام الجاية، هتبقى دي الزيجة التانية لأصالة اللي انتهت بسبب تعرضها للخيانة، لإنها سنة 1991 اتجوزت المنتج ورجل الأعمال السوري "أيمن الذهبي".

 وكانت علاقتهم قوية جداً لأنه كان بيدعمها في حياتها الشخصية وحياتها المهنية كمان لأنه كان بيدير أعمالها ودعمها في ألبوم "لو تعرفوا" اللي نزل سنة 1993وكان بداية قوية ليها.

أنجبت أصالة من زواجها الأول ولادها خالد وشام، لكن بعد 15 سنة من الزواج انفصلوا، وبعدها في أكتر من ظهور إعلامي وصحفي لأصالة قالت إنها اكتشفت إنه بيخونها، وأثناء حوار لأيمن الذهبي مع وفاء الكيلاني اعترف بإنه فعلاً كان بيخونها واتهمها بالتقصير والإهمال، بجانب إنه اتهمها هي كمان بخيانتها له مع طارق العريان وقال إنها وقعت في حب طارق العريان وهي لسه على زمته، لما كان طارق بيخرج لها أحد الكليبات، وقتها كان فيه خلاف بين أصالة وأيمن، وبعد الطلاق بسنة واحدة أصالة اتجوزت زوجها الثاني طارق العريان.


 

بعض المتابعين ربطوا بين تشكك "أيمن" في خيانة أصالة له لما سمعوا تصريحها الأخير في لقائها هي وزوجها طارق العريان مع نيشان في برنامج "توأم روحي" لما اعترفت إنها وقعت في حبه أثناء تصوير كليب "يا مجنون مش أنا ليلى"، وقالت حرفياً إن أثناء عشاء رباعي  يجمع بينها وبين زوجها وقتها أيمن الذهبي مع طارق العريان وزوجته السابقة إنها كانت بتبص لطارق العريان وتقول "ياه لو كان ده زوجي" وإن شرارة الحب كانت موجودة قبل انفصالها عن أيمن الذهبي.


انفصلت أصالة عن أيمن الذهبي سنة 2005 واتجوزت طارق العريان سنة 2006، ونتج عن الزواج ده طفلين توأم "آدم و علي"، وكان  زوجها ومخرج معظم أعمالها وكمان المنتج في نفس الوقت لأنه صاحب شركة Star Gate اللي أنتجت أخر كام ألبوم لأصالة بعد انفصالها عن شركة روتانا، وكمان كان منتج برنامجها الشهير "صولا" بالإضافة إنه كان سبب غنائها في بعض الأفلام زي الخلية و ولاد رزق لأنه كان مخرجهم، عشان كده ماحدش يقدر ينكر دور ودعم طارق العريان الفني لأصالة، وهنا بنطرح سؤال: هل مشوار أصالة الفني هيتأثر سلبياً بعد انفصالهاعن طارق العريان؟

من كل ده نقدر نقول إن "الخيانة" بأشكالها المختلفة هي عنوان قصص وعلاقات أصالة العاطفية، عشان كده ماكانش غريب إنها عملت أغنية في ألبومها اللي قبل الأخير بعنوان "أنا بتخان"، واللي وقتها طلع كلام إنها عبارة عن تصريح وإعلان غير مباشر لأصالة بتعرضها للخيانة من طارق العريان، وكلمات الأغنية كانت بتقول "أنا بتخان وعاملة نفسي مش سامعة ولا شايفة"، وأظن من الواضح إن أصالة الفترة دي قررت تبطل تبقى مش سامعة ولا شايفة!

Comments: