المعاناة اليومية للأشخاص اللي مش اجتماعية

15/10/2019

فيه أشخاص كتير مش مضايقين، مش زعلانين، مش "واخدين جنب"، مش مكتئبين هما بس مش اجتماعيين، ما عندهمش نفس القدرة اللي عند غيرهم على الاندماج السريع، أو الرغبة أصلًا في تقديم نفسهم والتعرف باستمرار على ناس جديدة، الناس دي عندهم معاناة يومية بسبب طبيعتهم وبسبب محاولاتهم لتوضيح ده دايمًا، جمعنا هنا أهم الحاجات اللي بيفكر فيها ويشوفها الشخص ده كل يوم.

1- بيكره حياته أما حد ما يعرفوش يبدأ يتكلم معاه، والمحادثة بتفضل مستمرة من طرف واحد بدون أي مشاركة منه، غير بابتسام أو هزة راس.

2- السماعات في ودانه معظم الوقت عشان مش مهتم يسمع اللي حواليه أو يتفاعل معاه.

3- الناس طول الوقت بتقول عليه إنه جد، غامض، مخيف، وأي تعليق طبيعي منه بيتشاف بشكل مريب لأنه ما بيحصلش كتير.

4- بيحتاج في فترات متقاربة جدًا إنه ياخد راحة من الناس وينعزل مع نفسه شوية عشان يستعيد هدوءه.

5- مش شيء كويس أبدًا بالنسبة له إنه يتفق مع حد على الخروج ويروح يلاقي لمة كبيرة ماكانش عامل حسابه عليها.

6- قبل ما يقبل يروح أي حفلة، فرح، خطوبة لازم يضمن إن فيه شخص على الأقل مقرب منه هيكون موجود.

7- فاشل جدًا في إنه يلاقي أعذار مقنعة يقولها عشان ما يخرجش مع أصحابه أو زمايله أو أي تجمع.

8- ما بيبادرش بسهولة إنه يعزم ناس عنده في البيت لأنه في الغالب بيزهق ويبقى عايز يمشي أول واحد فمش هيعرف يتصرف لو الناس عنده.

9- ما بتنفعش معاه محاولات إن الناس "تطلعك من قوقعتك" لأنك مش عيان وعايز علاج ومش في قوقعة ولا حاجة، دي طبيعتك.

10- كويس جدًا في تجنب الاشتراك في الحوارات اللي آخرها اتفاق على خروجة.

11- عايز منه أي حاجة، ابعتله رسالة.. ما تكلمهوش في التيلفون!

12- لو اتورط في مكالمة تليفون لازم تتعمل، بيكتفي برنتين تلاتة ويقفل عشان يبقى اسمه اتصل لكن الشخص ما يلحقش يرد.

13- أسوأ لحظات حياته لما يروح مكان مع ناس ومرواحه مرتبط بيهم ويبقى عايز يمشي وهما لسة بدري عليهم.

Comments: