۱۰ نصايح عشان تنزل Stories الناس تحب تشوفها على إنستجرام

15/10/2019


الستوريز بقت من أكتر الـ Features اللي عليها إقبال من متابعي ومستخدمي "إنستجرام" لدرجة إن فيه ناس بتفتح تتفرج على الستوريز وبتكسل تتفرج على الصور اللي الناس بتنشرها في الـ feed بتاع إنستجرام، ولو إنت من الناس اللي بتهتم بيها، فاحنا بنقدملك 10 نصايح عشان تنزل ستوريز الناس تحب تشوفها:

  1. ماتنزلش ستوريز كتير، لإن فيه ناس بيبقوا حاطين أكتر من 20 ستوري وعادةً مابنفتحش غير أول كام واحدة وبعدها بنقفل ومابنكملش لأن مابنعملش يعني فيلم وثائقي عن الحفلة أو عن الخروجة مع أصحابنا عشان ننزل ستوريز كتيرة كدة في نفس المكان، خليهم بحد أقصى 5 في اليوم.
  2. خلي كل ستوري بتقول حاجة مختلفة عن الستوري اللي قبلها، مدة الستوري 15 ثانية ودي مدة كافية تستغلها في إن اللي يتفرج عليها يعرف حاجة، زي مثلاً يعرف إنك بتاكل أو في حفلة أو سهران أو بتلعب كورة أو بترقص أو أياً كان، كده وصلت المعلومة للي بيتفرج لإن لو باقي الستوريز برضو كنت بتعمل فيها نفس الحاجة اللي بتعملها هيبقى شيء مكرر، عشان كده لو إنت في حفلة مثلاً صوّر الشخص اللي بيغني(الناس عرفت إنت في حفلة مين)، وبعدها خلي حد يصورك وإنت بترقص (الناس عرفت إنك بترقص وشافت إنت لابس إيه) ، خلي الستوري اللي بعدها ليك إنت وواحد صاحبك (الناس عرفت إنت في الحفلة مع مين)، وهكذا، وده القصد من إن كل ستوري تبقى بتقول حاجة.

  3. اهتم بالـ Storytelling techniques لإن ده اللي بيخلي الناس عندها فضول تتفرج على الستوريز لآخرها، وده بكذا طريقة، زي إنك تبدأ دايماً ببداية ووسط ونهاية، يعني أول ستوري تبقى بداية حفلة أو بداية تحضيرك لحاجة بتطبخها أو حاجة بتصلحها، وبعدها ستوري لأثناء ما بتعملها، وفي الأخر ستوري لشكلها بعد ما خلصتها، أو ممكن تستخدم طريقة قبل وبعد، بحيث أول ستوري تبقى مثلاً صورة وجبة بتاكلها، والستوري اللي بعدها يبقى الطبق بعد ما خلصته، وده ممكن يتطبق على حاجات تانية غير الطبق اللي بتاكله زي شعرك أو لبسك أو أوضتك.

  4. بلاش كلهم يبقوا عبارة عن صور "سيلفي" ليك، لإن ساعات بنفتح الستوريز ونلاقيها عبارة عن سيلفيهات كتيرة لنفس وش الشخص بس الأماكن اللي وراه متغيرة، الأفضل تنوع عشان الناس ماتزهقش، ممكن يبقى أول ستوري صورة للمكان اللي إنت فيه، وبعدها ستوري سيلفي ليك في المكان، وبعدها ستوري لحد من أصحابك قاعد معاك في المكان.

  5. بلاش تنزّل ستوري بصورة قديمة إنت نزلتها قبل كده أو صورة اتصورتها من كام يوم، لإن ميزة الستوري إنها لحظية، بتبين انت قاعد فين دلوقتي أو بتعمل إيه في اللحظة الحالية، وده بيخلي أصحابك مهتمين دايماً يعرفوا إنت فين دلوقتي أو بتعمل إيه وبتقضي يومك إزاي، لكن لو بتنزل صور قديمة أو اتصورتها من أسبوع مثلاً، هتفقد العنصر ده.

  6. فيه ناس كل الستوريز بتاعتها صور لأشياء حواليها، اللي بيصور كوباية الشاي أو شكل السما أو شكل الشارع أو أي لقطة شايفينها تستحق التصوير، لا شك إنها بتبقى صور حلوة وفيها نظرة فنية بتعبر عن اللي صورها، لكن ممكن ده يبقى ممل لأصحابك وزمايلك اللي بيتابعوك لأنهم بيبقوا عايزين وسط ده يشوفوا صورة ليك بجانب الحاجات اللي بتشوفها أو بتعملها.

  7. نوّع الستوريز بين فيديوهات وصور و Boomerang، عشان لو كلها فيديوهات بس ممكن الناس تتفرج على أول واحدة وتاني واحدة ويجوا على اللي بعدها يكسلوا يستنوا الفيديو يحمل أو يزهقوا، ولو صور بس هتبقى مملة، والتنوع هنا بين الأشكال المختلفة هيبقى ممتع وهيخلي الناس بتحب تفتح تتفرج على الستوريز بتاعتك.

  8. لو بتكتب حاجة على الصورة أو الفيديو اختار لون الفونت قريب من لون الصورة أو الفيديو عشان يبقى شكلها حلو ومايبوّظش المنظر الحلو اللي حابب تخلي الناس تشوفه بحيث يبقى فيه Harmony في الألوان.

  9. خليك Up-to-date واستخدم الـFeatures اللي عليه، بتبقى مسلية لو انت عندك وقت فراغ حابب تقضيه زي Ask me A question و زي الـ Gifs اللي بيبقى دمها خفيف وكمان حاجات تانية زي الـ Emoji bar والـ Music

  10. ماتكررش الستوري اللي بتنزلها كل يوم، لإن فيه ناس كل يوم الصبح لازم تصور القهوة على مكتب الشغل، أو اللي بيتصور كل يوم في الـ Gym وهو بيلعب أو وهو سايق لازم يصور الطريق وهو مشغل أغنية معينة، التكرار ده بيخلي الناس مش متحمسة تفتح الستوريز لإنهم بيبقوا متوقعين إنهم مش هيشوفوا شيء جديد.
     

Comments: