بالدليل: 10 أسباب هتقنعك إن الشاورما أفضل من الارتباط العاطفي

16/10/2019

بمناسبة إن النهارده يوم الأكل العالمي، فإحنا حابين نقول إن فوايد الأكل مش بس في قيمته الغذائية وكونه بيشبع احتياج أساسي وغريزي عندنا وهو "الجوع"، لإن الأكل اللي بنحبه ممكن يشبعلنا كمان رغباتنا العاطفية، وممكن وجبتك المفضلة تحسسك بسعادة وبفيض من المشاعر مش هتلاقيه لو ارتبط بفتاة أحلامك أو لو وقعتي في إعجاب الكراش اللي بتراقبيه في صمت ليل نهار، وبما إن الشاورما من أكتر الأكلات اللي الناس مؤخراً بقت بتحب تاكلها فاحنا جمعنالك الأسباب اللي تخلي أكل الشاورما أفضل من الارتباط العاطفي:

1- الشاورما معروف إيه أضرارها وهي سعرات حرارية زيادة هتخليك تتخن شويتين، لكن العلاقات العاطفية أضرارها حرقة دم والإصابة بالقولون العصبي وسنوات عمرك هتنقص للنص بسبب الخناقات والمشاكل اللي بتحصل.

2- الشاورما هي الشيء الوحيد اللي بيقدر يسعدك في وقت الهزائم والفشل وكل لحظات الضعف اللي بتمر بيها، تخيل مثلاً إنك اترفدت من الشغل، بمنتهى البساطة يومك هينتهي نهاية سعيدة مهما كان مليان دراما لو بس ختمته بإنك قاعد على السرير بتتفرج على فيلم المفضل وبتاكل شاورما ومتسمتع.

3- الشاورما أشكالها متنوعة جداً بشكل مش هيخليك تزهق منها، زي إنك ممكن تاكل شاورما لحمة أو فراخ، أو ممكن تضيف عليها جبنة، وممكن تاكلها مصري أو سوري وتقدر تغير في العيش بتاعها من فينو لكايزر لعيش صاج، أما حبيبتك أو حبيبك هيفضل زي ماهو طول السنين اللي انتوا مرتبطين ببعض فيها ومش هيتغير وده هيخليك تزهق منه بسرعة وتمل.

4- جسمك وانت بتاكل أكلة بتحبها زي الشاورما  بيفرز هرمون "الدوبامين" وهو الهرمون المسؤول عن شعورك بالسعادة، وده نفس الهرمون اللي بيتم افرازه لما بتبقى حاسس بشعور الحب، يعني علمياً تقدر تستغنى ببساطة عن الحب وتخلي جسمك ياخد هرمونات السعادة بتاعته من الشاورما.

5- الشاورما مش صعبة المنال، ببساطة بملغ يتراوح بين 20 لـ 30 جنية تقدر تشتري شاورما من أي مطعم يقابلك في الشارع، هتدخل تلاقي سيخ الشاورما جاهز ومستنيك بس تقوله "واحد شاورما لو سمحت" لكن الحب صعب المنال، ممكن تقعد كتير مستني اللي بتحبه ياخد باله منك ومن حبك، زي ما  شيرين عبد الوهاب "كتير بنعشق ولا بنقول وكتير بنعشق ولا بنطول".

6- ساندوتش الشاورما مش هيغير عليك وهيقبل بوجود ناس تانية معاكم في العلاقة، يعني مش هيتضايق من وجود التومية والبطاطس والمخلل وكمان زجاجة حاجة ساقعة جنب الوجبة لأنه بيبقى عارف إن ده هيساعدك تنبسط أكتر وإنك تتلذ وإنت بتاكله، على النقيض تماماً لما بترتبط بيبقوا عايزينك ليهم لوحدهم وممكن تنشأ حروب أهلية من أسباب بسيطة جداً زي إنك تنزل صورة مع حد من أصحابك علاقتك بيه بريئة.

7- هتستمتع بيها لأخر جزء من الساندوتش ومش هتلاقي جزء طعمه أسوأ من التاني، أما العلاقات مش كل المراحل فيها بتبقى حلوة وبيبقى فيها Ups & Downs وحاجات احنا مش حملها.

8- لو لاقدر الله و انفصلت عن علاقتك بالشاورما ده هينتج عنه ان وزنك هيقل وهتخسر سعرات حرارية، إنما لو انفصلت عن حبيبك هتدخل في اكتئاب وحزن شديد وهتحس بالوحدة في الليالي المظلمة، وأثناء الليالي المظلمة دي بتظهر الشاورما عشان تنسيك حبيبك وهتقولك في كل قطمة بتاكلها انها هتفضل بتسعدك حتى لو الكل باعوك.

وأظن دلوقتي مش محتاجين سبب رقم 9 أو 10 عشان تقتنعوا، وأتمنى دلوقتي تكونوا طلبتوا أوردر شاورما وقطعتوا علاقتكم بالشخص اللي بتحبوه

Comments: