۸ أشخاص لازم تعملهم "بلوك" على الفيسبوك

16/10/2019

عشان تفضل مبسوط بالوقت اللي بتقضيه على السوشيال ميديا لازم يبقى أسهل زرار بالنسبالك هو "البلوك"، اللي بـClick بسيطة عليه جنب بروفايل الشخص المستهدف بتقدر تتخلص من القرف اللي بيصدر منه إلى الأبد وبترتاح من الـ Negative vibes اللي بتطلع منه، وعشان تقضي وقت لطيف على الفيسبوك فيه 10 أنواع أشخاص لو موجودين عندك في ليسته الـ Friends لازم تعملهم "بلوق بلوق بلوق" حالاً:


1-اللي بيدخل يعمل Add للبنات أصحابك اللي بيعملولك كومنتات أو لايكات ويفضل يبعتلهم رسايل وبيرجعوا يقولولك مين ده وبتبقى محرج جداً قدامهم.

2- الناس اللي بتستناك تكتب رأيك في أي حاجة وخلاص حتى لو بتقول رأيك في لون فستان الفنانة فادية عبد الغني عشان يهاجموك ويعارضوك وبيخنقوا عليك في مساحتك الشخصية، دول تريح دماغك من الأول وأول ماتشوف الكومنت بتاعهم اعملهم بلوك علطول.

3-  قرايبك اللي مش بيحبوك، اللي كل ماتنزل صورة أو تكتب رأيك عن موضوع معين يروحوا يسخنوا باباك ومامتك عليك ويقولولهم شوفوا كاتب إيه وإزاي يقول كلمة "فشخ" دي قدام الناس! ومين البنات اللي هو متصور معاها دول مش عيب؟ ولو مانجحوش في إنهم يعملوا مشكلة بينك وبين أهلك فهما هيقولوا لباقي أفراد العيلة كلهم وأول ماتقابلهم يقولولك "إيه صحيح البوست اللي انت منزله ده؟".

4-  اللي بيسرق بوستاتك وينزلها عنده على البروفايل من غير مايعملك منشن أو يقول إنك إنت صاحب البوست وكأنهم لسه مايعرفوش باختراع جديد اسمه Share.

5- اللي بيفضل مراقبك من بعيد لبعيد ومابيعملكش أي لايك على صورك أو بوستاتك، لكن بيعمل لايك لكومنت حد بينقدك فيه أو بيقولك تعليق مش لطيف.

6- اللي كل مايشوفك أونلاين بيفضل يزن عليك في الـ Messenger  لو إنت مش عاوز ترد عليه دلوقتي ويفضل يبعتلك رسايل بشكل يخليك مش عارف تكمل باقي الـConversations اللي بتعملها، وممكن بعدها يروح متصل بيك Video call ويخلي موبايلك يهنج، وفي الآخر يتخانق معاك.

7-  المتحرشين، اللي مكانهم بيبقى رسايل الـ Others ودول بيستهدفوا البنات أكتر برسايل مريبة لا ينصح بإنك تفتحيها وإنتي لوحدك. 

8- الناس اللي بيلقحوا عليك بالكلام لو اتخانقت معاهم، وده نوع جبان جداً من الناس، اعملهم بلوك عشان يتجرأوا ويقولوا الكلام ده في وشك بدل ماهم بيقولوه وهما مستخبين ورا شاشاتهم.

Comments: