۲۲ نوع من الناس هتقابلهم على إنستجرام

17/10/2019


إنستجرام من أكتر منصات السوشيال ميديا اللي بتستمتع بالوقت اللي بتقضيه عليها، لإنه غالباً بيبقى عبارة عن صور لحاجات حلوة أياً كانت الحاجات الحلوة دي مناظر طبيعية، حيوانات كيوت، أو موديلز أشقية.

والناس على "إنستجرام" أنواع كتير، بس فيه كام نوع كده دايماً بيبقوا أنواع مشتركة عند الناس كلها، وإحنا رصدنالكم 22 نوع أكيد قابلت واحد منهم:

1- المراقب اللي دايماً بيعمل Seen لكل الستوريز بتاعتك لكنه عمره مابيعمل React عليها ولا عمره عمل Like على صورك.

2-الاتنين المرتبطين اللي كل شوية بيصوروا بعض قال إيه وهما مش واخدين بالهم وبينزلوها ويعملوا Mentions لبعض في الستوريز.


3-الناس اللي 24 ساعة في الـGym.. كل الستوريز بتاعتهم ليهم وهما بيتمرنوا ومفيش صورة على البروفايل بتاعهم غير وهما متصورين عرقانين أو واقفين بـPosition موضح العضلات بتاعتهم مع كابشن مليء بالحماس والطموح والإرادة كأنهم قدام صراع خفي لا يعلم أحد عنه شيئاً مع أنهم بيلعبوا رياضة مش حوار يعني.

4-اللي مابينزلش ستوريز غير للقطط والكلاب بتاعته، لدرجة تخليك تحس إنك عامل فولو لأكونت الكلب نفسه مش أكونت صاحبك.

5-اللي كل صوره على البحر في الساحل، صيف شتا خريف ربيع برضو في الساحل، وده بننصحك تعمل له Unfollow عشان أعصابك وقولونك.

6-اللي البروفايل بتاعه عبارة عن صور أكل وكل يوم يتحفنا في الستوريز بأكلات غريبة بتجوّعنا.

7- اللي بتتعامل على إنها موديل ومشهورة وبتطلع لايف تتكلم في أي موضوع وتبدأ الكلام بـ"هنتكلم النهارده عن" وبتتكلم بصيغة الجمع "يا جماعة" كأنها بتخاطب جمهورها وهي أصلاً عندها 50 followers  كلهم ولاد خالتها وأصحابها من المدرسة الابتدائية اللي مابيحبوهاش.

8-اللي بيتعامل مع إنستجرام معاملة بيت الجد والجدة، بيفتحه كل فين وفين، وكل فترة يخش يشقر كده وينزل صورة أو ستوري ويرجع يختفي تاني.

9-فيه اللي لما ينزل صورة جديدة يخش يعملك لايك على كذا صورة عشان تعمل له لايك على صورته الجديدة.

10-الناس المصرة إنها كل يوم الصبح لازم تنزل ستوري تقول فيها Good morning وكأن الشمس مش هتشرق إلا لما لما ينزلوا الستوري.

11-اللي مابينزلش صور خالص وعايش في دور الفنان اللي بروفايله صور مناظر طبيعية أو حاجات مش مفهومة بس يبدوا من منظرها إنها شكلها فني.

12-الناس اللي بتنزل صور سيلفي كتير كل شوية صورة وبتبقى شبه الصورة اللي قبلها بالظبط بنفس الهدوم وفي نفس المكان ومفيش أي شيء جديد.

13-اللي كل صورة بينزلها بيحط عليها 50 هاشتاج مالهمش علاقة بالصورة وبيبقوا هما هما نفس الهاشتاجات على كل الصور ومابتفرقش إذا كانت صورة على البحر أو في شارع هنفرس.

14-اللي بيتعاملوا بمبدأ "المقايضة" يعني مش هتلاقيهم بيعملولك لايك على صورتك غير أما تعملهم لايك قبلها على صورة منزلينها.

15-اللي عايشة دور "الفاشونيستا" اللي بتتحفنا كل يوم بصورة جديدة لابسة فيها ألوان مريبة وكأنها بتلبس من دولاب الفنانة فادية عبد الغني.

16-اللي كل الأكونت بتاعه صور أبيض وأسود وعايش دور العميق خالص.

17-اللي كل يوم بتحط 50 ستوريز من أفراح وحفلات ومناسبات بتتعزم عليها ولازم تنكد علينا بإنها بتعمل كل ده كل يوم وإحنا قاعدين في البيت مش لاقيين حاجة نعملها.

18- الـ Influencers اللي كل يوم بينزلوا ستوريز لهدايا جايالهم وهم بيعملولها Unboxing وبنشوف كل الحاجات اللي جايالهم ببلاش وإحنا محدش بيعبرنا.

19-اللي كل الصور بتاعتهم بيكتبوا عليها هاشتاج #TB اللي يقصدوا بيها Throwback ودي بيبقى مقصود بيها إن الصورة دي اتصوروها من مدة لكنهم منزلينها دلوقتي، وده شيء بيخلينا نتسائل لما كل صورهم #TB الصور اللي بيتصوروها دلوقتي بتروح فين!

20-اللي مابتنزلش غير ستوريز وفيديوهات ليها وهي في العربية بتغني مع الأغنية اللي مشغلاها لدرجة تخليك حاسس إنها عايشة في العربية ومابتظهرش غير وهي راكباها.

21-اللي كل الستوريز بتاعته بيتأفف من إنه في الشغل، يا إما في الشغل ونفسه ينام، يا إما سهران في الشغل وعايز يروح، يا إما نفسه يسيب الشغل.

22- فيه النوع الجدع اللي مفيش صورة بتنزلها مابيعملش عليها لايك، ومافيش ستوري ليك غير أما يكون أول واحد شايفها وده نوع نادر جداً لو لقيته تمسك بيه وحافظ عليه كويس عشان غالباً مش هتلاقيه للأسف في ليسته الـ Followers بتوعك.

Comments: