الوش التاني..14 حقيقة هتقتل انبساطك بالجو المغيم 

22/10/2019

مع نهاية شهر أغسطس وبداية سبتمبر بتقل نسبة تعرضك لضربات الشمس وبتتخدع وتفتكر إن كده خلاص الجو هيشتي بقى أخيرا بس بيتضحك عليك كل مرة وإنت بتشرب المقلب عشان يومين كده الجو فيهم بيبقى هوا زيادة وبتضطر تستني لحد شهر أكتوبر عشان تبدأ تشوف مظاهر الشتا اللي بتظهر مرة واحدة من تاني زي النهاردة كده.

جو الشتا اللي بيظهر يوم واحد مرة واحدة كده بالنسبة لناس كتير جميل وسو كيوت بس له وش تاني مستخبي محدش بياخد باله منه زي:

1- الأيام اللي زي النهاردة بيبقى فيها مطرة لمدة يوم واحد بتبقى لسه مش شتا برضه وهتفتكر الشتا دخل بس في الحقيقة إنت لسه في الخريف والجو هيرجع يبقى مشمس تاني.

2- هتتخم برضه وتبدأ تنزل اللبس الشتوى وتشيل اللبس الصيفي بس هتحتاج لسه اللبس الصيفي 

3- لو مالبستش تقيل في الأيام اللي زي دي هتتعب ويجيلك برد 

4- أيام الخريف عموما معروفة إن اللي عنده حساسية بيزيد فيها عنده الحساسية 

5- هتسمع خناقات الناس اللي بتحب الصيف وخناقات اللي بتحب الشتا ومحبي الصيف يفضلوا يقولوا مبسوطين كده؟ ومحبي الشتا يتسفوا عليهم 

6- هتلبس صيفي هتتحر، هتلبس شتوي هتسقع، وعموما الصبح هتبقى حران بليل سقعان ومفيش جو معتدل دي 

7- هتواجه مشاكل خناقات التكييف في الشغل وفي البيت والأماكن العامة 

8- إكتئاب الخريف وحلاوته طبعا مش محتاجين نتكلم عنه بس هيخليك عايز تعيط طول الوقت وخصوصا لما الدنيا تغيم 

9- التايم لاين بيقلب كله It's raining وقلب أزرق وقلوب 

10- شنطتك لازم يبقى فيها شال أو سويت شيرت عشان الجو مش مضمون أكتر من الإكس

11- طبعا في اليومين دول بننسى الشياكة والأناقة خالص عشان أول ما بتسقعي بتحطي الشال عليكي سواء لايق على الهدوم أو مش لايق فبتلاقي نفسك عاملة كولكشن هدوم وألوان فوق بعض ولا مهند كوجاك

12- الجو المغيم من أول اليوم ده بيخليك تحس إن اليوم خلص خلاص وبتبدأ تكسل بدري بدري 

13- هتسقع أكتر من الشتا في خروجات بليل عشان مش هتبقى مشتي وأغلب الوقت هتبقى عايز تعمل بيبي 

14- لو اشتريت لبس صيفي والـ Sale اللي عليه حمسك تشوفه بقى السنة الجاية خلاص كل سنة وإنت طيب


 

Comments: