١٠ حاجات لازم تعرفهم لو هتسوق سكوتر في مصر

22/10/2019

خلينا في البداية نعترف إن السواقة في مصر صعبة عمومًا، سواء بسبب الطرق غير الممهدة أو بسبب أشباح الطرق اللي بنشوفهم حوالينا وإحنا سايقين.. في الموضوع ده هنقولك شوية نصايح بسيطة يمكن تساعدك لو كنت بتسوق "سكوتر" في مصر أو بتفكر تخوض التجربة.

- مبدأيًا لو بتعرف تسوق عجلة ومابتقعش وأنت بتسوقها فإنت مش هتاخد وقت كتير عشان تتعلم تسوق "سكوتر" وتمشي بيه لوحدك.

- هتقعد مدة معقولة لو بتجرب السواقة لأول مرة عندك قلق شوية وإنت سايق.. والكباري بالنسبالك هتبقى عبارة عن فيلم رعب داخل تشوفه، بس ماتقلقش الموضوع مش هيطول وبعدين هتتحول لشبح زي الأشباح اللي كنا بنتكلم عنهم فوق.

- حاول في بداية سواقتك تتجنب الطرق السريعة زي الدائري والمحور والكباري الكبيرة، خليك شوية ع الأرض لحد ما تبقى مطمن نفسيًا وحافظ أبعاد الاسكوتر بتاعك ومفيش حاجة مخلياك قلقان من السواقة.

- وأنت ع الطريق ركز كويس أوي مع الأرض لإنك هتقابل حُفر صغيرة كتير ودي من أصعب المشاكل اللي ممكن تواجه أي حد بيسوق أي حاجة ماشية على عجلتين.

- خليك معتقد دايمًا ان اللي حواليك مش شايفينك، لإن في الحقيقة الناس اللي سايقة عربيات حواليك بتتعامل معاك على إنك شيء مش موجود، مش بيدولك أي اهتمام أو مساحة، فأنت خد حذرك من البداية واتعامل على الأساس ده.

- في أغلب الأوقات حاول تبقى ماشي دايمًا على يمين الطريق، أمان أكتر بالنسبة للإسكوتر، وهيبعدك عن مشاكل لو حد بياخد غرزة بشكل مفاجىء أو يطلع فجأة قصادك.


- الخوذة شيء مهم جدًا وهتحسسك بأمان وأنت سايق، بغض النظر عن إن كتير مننا بيتضايق منها عشان بتقيّد حركته أو بتضايقه وهو سايق، لكن في الحقيقة ليها عامل نفسي مهم جدًا للسواقة.

- اطمن كل فترة على صيانة الاسكوتر بتاعك وان كل حاجة فيه تمام، وطبعًا متنساش تغير الزيت في مواعيده وماتكسلش في الموضوع ده بالذات.

- طبعًا الاسكوتر أسهل وأسرع حاجة تتسرق في مصر، فخليك دايمًا في الأمان، إما تركن في جراج أو تجيب قفل تخليه دايمًا في شنطة الاسكوتر عشان لو اتزنقت في ركنة واضطريت تستخدمه.

- الاسكوتر في مصر اللي الناس شايفاه كيوت وجميل وخفيف وممكن تقرر تسوقه وتمشي بيه في أي وقت، هيخليك تقضي يوم جميل في المرور عشان تطلع رخصته وتعرف تمشي بيه، ونصيحة أوعى تقرر تمشي من غير رخصة الاسكوتر نفسه عشان دي فيها نيابة.

Comments: