٦ أنواع "ستوري" على إنستجرام عشان تلفت انتباه الكراش

22/10/2019

السوشيال ميديا دلوقتي بقة من أهم وسائل تعبير الواحد عن نفسه وأفكاره، وتوصيل رسايل مختلفة بحالته ورغباته، ومما لاشك فيه إن العلاقات بتشغل حيز كبير من بال كل واحد وبتبقى مؤثر ودافع مباشر لتصرفاته وأفعاله سواء في الحياة أو انعكاسها على منصات التواصل الاجتماعي، عشان كده جمعنالك هنا نصايح عشان تبعت رسالة غير مباشرة للـ "كراش" أو الحبيب المنتظر، تلفت نظره ليك وتقوله إنه هو اللي في بالك.

1- التشويق

حط صور ليك في أحسن حالاتك، أو في حالة مميزة ليك حاسس نفسك فيها قد إيه جميل، وممكن تكتب أي تعليق مالوش علاقة بالموضوع، كأنك مش واخد بالك إن فيه حاجة مختلفة، أو تعليق مباشر بهزار أو شيء من هذا القبيل إنك النهاردة جميل، اختار حسب الموقف وحسب شخصيتك.

2- الميمز

من لغات العصر حاليًا هي التعبير بالميمز، استغل أي حوار بينكوا قالك فيه عن فيلم أو مسلسل عجبه، اتجاه مواقف معينة بيحب يتريق عليه أو ينتقده، وشوف الميمز اللي لها علاقة بيها حطها ستوري، ده ممكن يبقى بداية حوار مباشر بينكوا أما يدخل ويكلمك.

3- الهواء الطلق

لو إنت شخص كسول بتقضي أجازتك كلها على الكنبة مش لازم يكون ده اللي تقوله لو اللي معجب بيك شخص بيحب الخروج أو السفر، مش المقصود إنك تبقى كداب أو مدعي ولا بتحاول زيادة عن اللزوم، لكن إنت بس "بتفتح كلام" عشان يدخل يسألك لما تحط صورة على جبل أو في رحلة خلوية كنت فين؟ أو رحت أماكن معينة ولالا؟ ووقتها ممكن عادي تتكلم عن نفسك ببساطة وصراحة وتقول إن دي مش حاجة عادة بتعملها وما إلى ذلك.

4- دور على المثقف اللي جواك

لو الكراش بتاعك بيحب يقرا، أو على الأقل مطلع، حط حاجة لها علاقة بكتاب عجبك أو بدأت تقراه، عشان يدخل يكلمك عن حسن اختيارك، أو يسألك إذا كان غجبك ولالا؟

5- ستوري الأغنية

طول الوقت بنشوف ناس بتحط ستوريز للأغنية اللي بيسمعوها واللي هي في الغالب مش أهم نوع ستوري ممكن حد يهتم بيه، لكن لو فيه أغنية مشتركة بينكوا، أو مغني أو فرقة عارف إنهم مهمين بالنسبة له، ممكن تبقى فرصة تستحق التجربة عشان يدخل يكلمك عنها.

6- الأماكن

مش لازم بشكل فج ومباشر تعمل "تشيك إن" للمكان اللي إنت فيه عشان تقول إنت هناك لو هو مكان قريب من الكراش بتاعك أو بيروحوا عادة، لكن يكفي إنت تصور كرسي أو زاوية مميزة، صور الحاجات اللي على الترابيزة، عشان ده يبقى دافع إنه يدخل يكلمك يقولك إنت هناك من أمتى أو قاعد قد إيه وهو بيروح إمتى.. إلخ.

Comments: