للحفاظ على العلاقة.. إزاي تتخانقوا بشكل صحي؟

22/10/2019

الخناق دايما معروف بالصوت العالي والكلام السخيف اللي بيزعل وفي الغالب بعد كده بيطلع فيه حد غلطان بسبب الغضب اللي جواه واترجم لكلام بيسيء للطرف التاني اللي في الخناقة، خصوصا بقى لو الخناقة دي كانت بين اتنين في علاقة، الموضوع بيتطور إن العلاقة دي ممكن تنتهي خالص بسبب لإن فيه بعض الناس بتحاول تكسب نقط على حساب إنها تأذي الطرف التاني اللي بيحبوه.

النوع ده من الخناقات بيوصل الناس لنهاية علاقات ومابيقدروش يرجعوا لبعض تاني عشان الكلام اللي اتقال مابيتنسيش، عشان كده من الصحي جدا إن الناس تبقى بتتعلم تجادل وتناقش بعضها إزاي من غير ما يؤذوا أو يجرحوا بعض، وفي نفس الوقت لو قررت ماتتكلمش خالص فإنت بتختار تدمر علاقتك بالطرف التاني في العلاقة.

فيه دكتور اسمه "أرتون جولدسميث" كتب في موقع psychology today عن الخناقات، وقال إن الخناقات أو الجدال من غير قسوة أو اندفاع بيقلل إن الطرف التاني يكون عدواني أو متعجرف في المناقشة، وهي دي الحقيقة لو اتحولت منكوا المناقشة لجدال أو يبقى فيه مين اللي خسران أو مين اللي كسبان إنتوا الاتنين في الغالب هتخسروا، فلو افتكرت وإنت بتتكلم إن الشخص اللي بيغضب أو بيثور الأول هو اللي بيخسر ده ممكن يساعدك تهدي رتم كلامك شوية، وهيخليك تراقب نفسك وإنت بتتكلم وده هيساعدك تشوف المشكلة الأساسية فين، ومش هتوصلوا للمرحلة بتاعت الخناق اللي هتخليكوا تؤذوا مشاعر بعض، ولو وقعت في الفخ بتاع الصوت العالي حاول ترجع نفسك تاني.

وإنك تتعلم تتجادل أو تنناقش أو تعرف تاخد حقك بكل هدوء وصوت واطي ده مفيد في الحياة العامة مش بس في العلاقات لإنه هيساعدك تحل مشاكلك بشكل أسهل، لإن بمجرد ما الطرف التاني بيعرف إنك سمعته بيبدأ يهدى شوية ويستريح إنه قال جزء من المشاعر اللي جواه وبكده هيتخلى عن استياءه على طول، فلو عكست الموضوع على نفسك ولقيت إن الشخص اللي قدامك مش قادر يسمع حتى مشاعرك أو يعرف إنت حاسس بإيه مش هتتخلى عن مشاعرك السيئة، فإنك تسمع ده لوحده مفتاح مهم جدا في بداية حل المشاكل.

والنوع ده من الحلول بيساعد الأطراف أصلا يعرفوا بعضهم كويس، والسمع عموما بيساعد شريكك إنه يتخلى عن خوفه من إنه يقول احتياجاته ومشاعره الحقيقية، وإدراك إنك ممكن تسمع حاجة ممكن تضايقك أو تخليك حزين ومش كويس هيساعدك من الأول إنك تعرف إن شريكك مش عايز يأذيك وطبعا هتطلعوا بأكبر فايدة إنكوا تحافظوا على العلاقة في الآخر (ده طبعا لو كنتوا عايزين كده وهدفكوا من العلاقة إنكوا تكملوا).

بس خليك عارف إن الناس اللي عايزة تحافظ على العلاقات بغض النظر عن مسمى العلاقات فهما لازم يحافظوا على احترامهم لبعض في المناقشة، في الحقيقة هما بيتجنبوا إهانة بعض أو عدم احترام بعض زي الأمراض المؤذية لإنهم عارفين إن الكلمة ممكن تكسر قلب حد، فلما تبقى عارف إن اللي قدامك هيحترمك ومش هيهينك مش هتضطر تحمي نفسك أو تتجنب المواجهة، وثقتك إن خطابك مش هيكون مؤذي هيخليك قادر تشارك أفكارك.

الحقيقة هي إنك لما تتعلم إزاي تعبر عن مشاعرك بطريقة غير مؤذية وبحب، هتشوف إن الطريقة هتساعدك بسرعة تكون مع شخص بتحبه في حياة مريحة.

Comments: