١٢ حاجة تسلي نفسك بيهم وإنت متعطل في المرور

23/10/2019

في ظل الوقت الحالي ودخلة الشتا علينا بعواصفه وأمطاره، أصبح التعرض لمشاكل المرور والعطلة بالساعات وسط الطريق حاجة محتمل جدًا إنها تحصل كل يوم، عشان كده ولأنك مش هتقدر ما تنزلش تخلص مصالحك، ولا هتقدر كل مرة تتنبأ إن ده اللي هيحصل، أفضل حل هو إنك تعرف أما تتزنق ممكن تخلي الوقت يعدي إزاي؟

1- خلي معاك كتاب عايز تقراه بس ماعندكش وقت في العادي، ده هيكون وقت مناسب للتركيز المؤقت في حاجة زي دي، هتهون عليك الوقت.

2- الـ "بودكاست" والكتب المسموعة من الحلول المميزة جدًا في الحالات دي، لو مش عايز تشيل كتاب في إيدك شغله مسموع من أي تطبيق، أو افتح "بودكاست" اسمع أي موضوع حد بيتكلم عنه هتندمج معاه لحد ما الوقت يعدي.

3- اكتب "بوست" على أي منصة تواصل اجتماعي بتفضلها، عن اللي حاصل وسبب العطلة وتعليقك عليها، ده مش شرط يبقى معناه إنك بتشتكي، لكن المشاركة وردود الناس أو محاولاتهم التواصل معاك فعلًا بتخلي الوقت يعدي بسرعة، بجانب إنها هتطلع طاقة الغضب أو الزهق اللي ممكن تبقى ضاغطاك.

4- نام، وده طبعًا لو ماكنتش إنت اللي بتسوق.

5- انزل حرك عضلاتك وارجع اركب تاني.

6- اعمل حاجات مأجلها بقالك وقت، زي مكالمات لناس قرايبك تسأل عليهم، تفضي الإيميل بتاعك، تعمل ليستة بحاجات لازم تعلمها أو تشتريها.

7- كلم حد صاحبك قريب منك افتح معاه أي موضوع.

8- افتح الراديو عدي على كل القنوات، وممكن كمان تبعت تطلب أغنية وتستنى أما تتعرض.

9- العب أي حاجة على موبايلك، ولو راكب مع أصحابك، العبوا حاجة تجمع بينكوا كلكوا، زي "heads up" و"Never i have ever" ممكن تتعرفوا على بعض بشكل جديد خالص بعد راوند واحدة.

10- ما تحاولش تجيب مشروبات سخنة أو ساقعة عشان لو القعدة طولت هتبقى عايز تدخل الحمام وهيبقى تكدير.

11- خلص خناقة كنت مأجلها أما تروق أو تفضى.

12- اعمل حسابك وخلي على موبايلك حلقة أو اتنين من المسلسل اللي بتتابعه وشوفهم في السكة.

Comments: