حكايات المصريين عن "تلات المطرة": زنقة بالـ 6 ساعات وحملات لمقاطعة "سينابون"

23/10/2019

بسبب الأمطار اللي كانت أشبه بالسيول على مناطق مدينة نصر ومصر الجديدة والأماكن المحيطة بيهم حصل ازدحام وتكدس مروري عمل شلل في شوارع القاهرة الكبرى كلها تقريبا لحد محافظة الجيزة، فبقى المشوار اللي الشخص ممكن يروحه في نص ساعة خد منه وقت حوالى 4 أو 5 ساعات وفيه ناس كتير اضطرت إنها تمشي مسافات كتير تحت المطر وفي المياه عشان يعرفوا يروحوا ويرجعوا بيوتهم.

لكن زي ما بنقول كده أهو إحنا كبار وهنعرف نتصرف، فكانت المشكلة الأكبر في طلاب المدارس والأطفال ورجوعهم من المدارس في المطرة والتكدس المروري ده، وعدد كبير من أتوبيسات المدارس اللي كان فيها أطفال علق في الزحمة دي، وكانت النتيجة إن فيه أطفال روحت بيتها الساعة 10 بليل بدل من 2 أو 3 العصر لإن الطرق كانت في أسوأ حالتها.

وده طبعا كان سبب في مشكلة كبيرة جدا اتعرض لها الأطفال إنهم من غير أكل ولا استخدام للحمام، وكتب ناس إن كان فيه باص في منطقة الميرغني لمدرسة st.john American الأطفال اللي فيه عايزين يدخلوا الحمام ومشرفة الباص خدت الأطفال عشان يستخدموا حمامات "ماكدونالدز" و"سينابون" الميرغني لكنهم رفضوا ومارضيوش يدخلوهم، فالمدرسات اضطروا يودوا الأطفال فندق البارون عشان يستخدموا الحمام.

وحاليا انتشر على تويتر هاشتاج قاطعوا سينابون وماكدونالدز بسبب الموقف اللي خدوه من الأطفال وبسبب عدم تعاون موظفين الفروع من الأطفال والحالات الإنسانية اللي من النوع ده، وده كان "ثريد" لأب كتب فيه على موقع التواصل الاجتماعي تويتر عن اللي حصل مع ابنه:

لكن "سينابون" مصر طلعوا بيان، أكدوا فيه إن ده سوء تفاهم وإنهم لا يمكن يعملوا الموقف غير الإنساني ده، وإنهم كانوا بيحذروا بس من انقطاع المياه عن الحمامات في الوقت ده:

ودي تويتس شاركوا الناس بيها بعد ما عرفوا اللي حصل وفعلوا الهاشتاج:

وعموما، شارك المصريين حكايات مأساوية عن يوم غريب اتعطلت فيه المحاور الرئيسية في مناطق مصر الجديدة ومدينة نصر، زي شوارع عباس العقاد ومكرم عبيد ونفق العروبة ونفق الثورة، واللي طبعا عمل تكدس مروري في مناطق زي التجمع ودائري المعادي وامتداد رمسيس لأن نزلات كوبري أكتوبر في اتجاه نفق العروبة وطريق النصر كانت مقفولة، وده برضه أدى لأن مناطق زي شيراتون تتحاصر وتبقى مداخلها ومخارجها كلها زحمة:

Comments: