لمهاويس الـ Gaming والمنافسة.. 14 سبب يخلوك تحضر مهرجان "إنسومنيا مصر" للألعاب

23/10/2019

في أكبر مهرجان للألعاب الإلكترونية والترفيه في مصر والشرق الأوسط، هيتجمع آلاف الجيمرز والمئات من الشركات المصرية والعالمية الرائدة في مجال الألعاب، في مركز مصر للمعارض الدولية والمؤتمرات في التجمع الخامس، في مهرجان "إنسومنيا مصر" التاني، في الفترة من 31 أكتوبر لـ 2 نوفمبر 2019.

المهرجان بيوفر تجربة ترفيهية فريدة لكل محبي الألعاب الإلكترونية على اختلاف أنواعها والتجربة متاحة لكل الأعمار، وبيقدم كمان تجربة "بيزنس" ومعرض لصناع ومصممي الألعاب سواء من الشركات الكبيرة أو الشباب المستقلين، عشان يبيعوا منتجاتهم وألعابهم لزوار المعرض.

"إنسومنيا مصر" هو النسخة العربية من مهرجان "إنسومنيا" البريطاني، واحد من أكبر مهرجانات الألعاب في العالم، واللي بيتعمل في مصر للسنة التانية على التوالي عشان يجمع كل المطورين والشركات وطبعا هواة ومجانين الألعاب الإلكترونية، وسواء كنت جيمر أو مهتم بالألعاب، أو عايز تقابل أكبر صناع ومطوري الألعاب في مصر والعالم، أو حتى عايز تقضي وقت لطيف وتلعب شوية، ففي أسباب كتيرة عشانها لازم تزور معرض "إنسومنيا مصر" التاني:

1- أكبر معرض ألعاب إلكترونية في مصر والشرق الأوسط، بخبرة "إنسومنيا" العالمية في المهرجان اللي بيتنظم في بريطانيا لأكتر من 60 دورة قبل كده

2- في دورة السنة اللي فاتت، حقق المعرض نجاح كبير وجذب محبي الألعاب الإلكترونية وصناعها كمان، وزاره أكتر من 10 آلاف زائر، حضورك هيتيح لك تبادل الخبرات مع نجوم المجال من المطورين وصانعي الألعاب، ده غير التنافس الشديد في الدورات والمسابقات المختلفة مع لاعيبة من الدرجة الأولى

3- مجموع جوايز المهرجان في مسابقاته ومنافساته المختلفة، 500 ألف جنيه

4- المعرض السنة دي هيتعمل على مساحة 22 ألف متر مربع وهيبقى مليان بـ Zones مختلفة للألعاب الإلكترونية والترفيه، زي E Sports Zone والـ Cosplay Zone ده طبعا غير منطقة ألعاب الموبايل والألعاب المستقلة Indie Games والـ Virtual Reality والـ Laser Tag Cmobat Zone والـ Retro Zone.

5- في الـ Zone الخاصة بالـ Retro Gaming  الراعي هو "ماجيك بلانت"، واللي بيوفر عدد كبير من الألعاب المتطورة والأجهزة الممتعة، أما في Zone ألعاب الموبايل، فهتلاقي آخر تحديثات وأجدد ألعاب موجودة في السوق، مع مسابقات هتقدر تتنافس فيها مع كتير من أشباح الألعاب دي

6- في Zone الـ E Sports هتلاقي مجموعة كبيرة ومتنوعة جدا من الألعاب، زي مثلا Fortnite, FIFA 20, League of Legends Counter Strike, Rainbow Six Seige, Tekken 7, ، والمسابقات متنوعة جدا، من أول الجيمات الودية بين فردين، لحد البطولات الكبيرة اللي بتضم فرق

7- الـ Cosplay Zone في مهرجان "إنسومنيا" بيقدم أكبر ألعاب تنكرية في مصر، وهي مسابقات بيحكم فيها لجنة عالمية متخصصة ومجموع الجوايز فيها بيوصل لـ 55 ألف جنيه


8- المهرجان بيقدم في جزء منه، معرض كبير جدا بتعرض فيه الشركات والمطورين آلاف الألعاب اللي ممكن تختار وتشتري منها، وفي دورة السنة اللي فاتت 85% من الزوار (اللي عددهم 10 آلاف) اشتروا على الأقل لعبة واحدة من العارضين


9- تذكرة واحدة بس للشخص، هتديك Access على كل الألعاب والـ zones

10 - المهرجان السنة دي هيضيف للـ Geeks والمهاويس، ركن خاص بالكتب المصورة أو الـ Comic Books وأفلام الفانتازيا والخيال العلمي 

11- من إضافات الدورة الجديدة من "إنسومنيا"، منطقة الترفيه العائلية، واللي بتتيح للآباء وأولياء الأمور ألعاب ونشاطات ترفيهية خاصة بيهم
12- هيكون فيه Market Place أكبر هيتيح التواجد للعارضين ومصممين ومطورين الألعاب الصغيرين بمنتجاتهم

13- المهرجان هيتعمل على 3 أيام "ويك إند"، هيبدأ الخميس 31 أكتوبر من 2 الضهر لـ 2 الفجر، والجمعة والسبت من 11 الصبح لـ 11 بالليل 

14- التذاكر متاحة أونلاين تقدر تحجزها بسهولة من على موقع "فيرجن ميجا ستور"
 

Comments: