١١ سبب يخلوا أي بنت تشتري لبسها من الوكالة: فاشونيستا بأقل الأسعار

03/01/2020

أوقات كتير شرا الهدوم بيبقى مهمة صعبة ومحتاجة ميزانية أو مرتب شهر كامل أو في بعض الأوقات زي الشتا مثلا بتبقى محتاجة ورث مثلا أو تبيع غواشة من غوايش الحاجة عشان تجيب جاكتين على بوت أو جزمة شتوي.

وللأسف حتى لو اشتريت من محلات عادية هتلاقي برضه الأسعار غالية لكن لو اتهورت واشتريت من براندات فهتتعور في مبلغ حلو، في الحالات اللي زي دي ممكن نلجأ لبعض الأماكن الموفرة زي الستوكات أو المحلات اللي بتبيع الهدوم المستوردة، أو الحل السحري لكل بنت فاشونستا وهو الوكالة.

بس فيه أسباب كتير ممكن تخلي أي بنت تنزل تشتري هدومها من الأماكن دي زي مثلا:

1- الأسعار في الوكالة في متناول أي فرد، فمثلا البلوفرات الشتوي أسعارها بتبقى بين 80 جنية لـ 150 جنيه أكتر من كده بتبقى هدوم نضيفة جدا، ودي تشكيلة أسعار تسمح لأي شخص إنه يشتري 

2- الهدوم في الوكالة فيها تنوع كبير لإنها مش تبع مصنع أو محل معين عشان كده اللي بتشتريه من هناك صعب تلاقي حد تاني لابس زيه 

3- قماشات الهدوم هناك بتبقى حلوة لإن أغلب الهدوم بتبقى هدوم مستوردة وماركات وده سبب إن بيتقال عليها هجوم بالة لإنها بتبقى مستوردة من بلاد أوربية وبعضها بيبقى مستعمل.

4- شوية لف في الوكالة بس هتلاقي هدوم عليها التيكت بتاعها.

5- الجواكيت الشتوي بتبقى في المحلات بأسعار ألف جنيه أو أكتر في الوكالة أغلى جاكيت مش هيعدي الـ 500 جنيه

6- غير كده كمان فيه محلات في الوكالة بتبيع نفس اللي المحلات والماركات العالمية بتبيعه بس بأسعار أقل ويمكن توصل للنص وده بسبب إن الهدوم ممكن يبقى فيه غلطة مش باينة أصلا

7- حتى لو لقيت الهدوم اللي بتتباع في الوكالة أونلاين لما تشوف الهدوم قدامك وتمسكها وتعرف هي لايقة عليك ولا لا ده بيبقى أحسن ومريح أكتر

8- هتلاقي أي نوع من أنواع الهدوم وخصوصا للستات والبنات سواء كان هدوم بيت أو خروج أو للمصايف (وده في الصيف بس) أو فساتين أو لبس سوارية 

9- مش هتحتاج تفاصيل كتير لإن البياعين هناك بيحطوا أسعار معينة على كل مجموعة هدوم ومابيقبلوش فصال فيها 

10- هتلاقي هناك طبقات كتير من المصريين ومش هتحس إنك لوحدك اللي بتشتري هدوم من الوكالة

11- هتعود بفايدة كبيرة على البيئة عشان هتعيد استخدام هدوم كان ممكن تترمي

Comments: