٩ نصايح عشان ما ترجعش تكلم الإكس في عيد الحب

04/11/2019

كل شخص في حياته قصة، مهما كانت كبيرة أو بسيطة، حصلت بالفعل ولا كانت حلم عندك أو صورة في خيالك، أحزانك وأهواءك، وممكن مع الوقت توصل لحالة استقرار على حالك سواء سعيد أو حزين، لكن بتحصل حاجات بتلعب دور زي العامل المحفذ في الكيميا، بتزود سرعة أفكارك وتدفق مشاعرك وأشجانك، ودي ممكن تبقى فيلم، أغنية، رواية، قصة حد بيحكيها، أو حدث زي عيد الحب.

الانفعال اللي ممكن يحصل بسبب تدخل خارجي ممكن يبقى سبب إنك تعمل تصرف مالوش لزوم، أو لحد امبارح ماكانش منطقي إنك تعمله، زي إنك ترجع تكلم حد انتهت علاقتك بيه تقوله أنك بتحبه أو تشتمه مش هتفرق، المهم إنه هيكون تصرف متهور هيأثر على حياتك فترة كبيرة قدام من غير لزوم، ودي شوية نصايح عشان ده ما يحصلش.

1- لو إنت بالفعل في علاقة جديدة لكن لسة متأثر بعلاقتك القديمة، ما تخليش عندك توقعات كبيرة من شريكك الحالي لليوم ده، ما تنتظرش إنه المفروض يبقى عارف أحزانك وينسيهالك كلها، وتلومه من جواك أما ده ما يحصلش فتشوف ده مبرر كافي إنك تروح للإكس تقوله وحشتني أو شوفت سايبني فإيه؟

2- افتكر إنه لو عايز يكلمك كان كلمك.

3- الحنين اللي هتحس بيه، الذكرى بعينها اللي بتقعد تفكر فيها كتير كأحسن ذكرى في حياتك دي في بالك إنت بس، ما تفتكرش إنك لما ترجع تكلمه هتلاقيه هو كمان بيفكر فيها وحاسس زيك ومستنيك!

4- الكلام اللي قالهولك/ قالتهولك في وقت زي "ما تسبنيش" أو "أنا ماليش غيرك"، "مالناش غير بعض"، "أنا وحيد"..إلخ كلها حاجات كانت مرتبطة بالوقت والظروف ساعتها ما تاخدهاش حجة إنك ترجع تكلمه عشان هو محتاج مساعدة أو عشان تفكره بالوعد ده.

5- تاني.. افتكر إنه لو عايز يكلمك كان كلمك.

6- لو إنت مع شخص جديد حاول تبادر بإنك تعمل حاجة كويسة مش لازم تستنى هو هيعمل إيه، اعمل ده عشان نفسك مش شرط عشان حد، لأنك لو قدرت تبسطه إنت كمان هتنبسط.

7- ما تحاولش تتجاهل مشاعرك، لو وحشك واجه نفسك بده، اكتبه في نوت على الموبايل أو ورقة، احكي لحد من أصحابك، أو زي ما واحد من أبطال فيلم "طعام.. صلاة.. حب" كان بيقول لما جوليا روبتس قالتله إن حبيبها وحشها قالها ما معناه "إيه المشكلة، ابعتيله نور وحب في كل لحظة يوحشك فيها، وسيبي الموضوع، إنتِ بس خايفة تنسي آخر حاجة من القصة دي لأنك ساعتها هتبقي فعلًا وحيدة".

8- لو الكلام ما جابش فايدة وكلمته طلع اللي جواك عشان ترتاح وتتأكد إنك خلاص استنفذت القصة دي وعملت اللي عليك.

9- افتكر إنه لو عايز يكلمك كان كلمك!!



 

Comments: