١١ فايدة لسماع أغاني المهرجانات: رقص وأفراح وهيبرة

04/11/2019

أغاني المهرجانات هي شكل من أشكال تطور المزيكا الشعبية في مصر، النوع ده من الأغاني بقاله سنين بيتطور وكان بيتعمل بأجهزة إمكانيتها قليلة لحد ما نوع الأغاني ده اتشهر وبقى يتعمل بإمكانيات عالية، وظهرت أغاني زي الوسادة الخالية مثلا اللي انتقدها ناس كتير وفي عز ما كانوا بينتقدوها كانوا بيرقصوا عليها.

وفيه مغنين كتير بعد ما اتشهروا بأغاني المهرجانات اتعملهم حفلات برا واتشهروا وكسبوا فلوس كتيرة زي الصورة اللي نشرها من كام يوم مطرب المهرجانات حمو بيكا جنب عربيته، ولكن بغض النظر عن التفاصيل الكتير عن المغنيين لكن حتى لو إنت معترض على النوع ده من الأغاني الشعبي ومش عاجبك فخليك عارف إن سماع المهرجانات الشعبي له فوايد كتير زي:

1- المهرجانات الشعبي بقت نوع من أنواع المزيكا المصرية اللي بيتعملها حفلات في دول كتير فلازم تبقى عارفها على الأقل 

2- هتسمع كلام كبار بجد وتعرف الأشباح بيتكلموا يقولوا إيه لبعض 

3- أغاني المهرجانات هي أكتر حاجة ممكن ترقصك وتفرفشك بغض النظر عن الكلمات حتى لو حزينة

4- معرفتك بالأغاني دي هتساعدك على النجاة في مواقف كتير زي لما تركب ميكروباص كده وتسمع الأغاني اللي سواقين الميكروباصات بيشغلوها، ساعتها مش هتبقى متضايق ولا هتحس بغربة

5- هتساعدك كمان على الرقص في الأفراح ومهما سنك كبر هتندمج مع الناس في الفرح حتى لو ماتعرفهمش 

6- لو قعدت مع ناس ماتعرفهمش ممكن تتكلم عن أغاني المهرجانات الجديدة ومغنينها والخناقات مثلا اللي بتدور في المجال ده كنوع من الكلام العام وهتعرف شخصية اللى قدامك منها 

7- ممكن تشغلها جنبك وإنت شغال أو بتذاكر كنوع من الأغاني الحماسية عشان تشتغل بسرعة 

8- ممكن كمان تعامها زي معاملة الأغاني الأجنبي اللي بنـ Work out عليها 

9- نفس الأغاني اللي بتهيبر عليها دي ممكن لو مجروح عاطفياً أو فيه حاجة مضيقاك أو حد من صحابك غدر بيك هتسمعها عشان هتندب وتعيط عليها 

10- الأغنية الواحدة فيها كلام كتير عن كذا موضوع بحيث برضه ماتزهقش وكده

11- دايما في آخر الأغنية هتسمع سلام وتحية لكل واحد اشتغل في الأغنية دي وهتعرف مين اللي كتب ومين اللي لحن ومين اللي وزع عشان دي جدعنة الصحاب 

Comments: