بعد جدل نسبه.. طليقة ملك ماليزيا نشرت صور لطفلهم عشان تثبت إنه ابنه

05/11/2019

بعد تأكيد أخبار انفصال محمد الخامس ملك ماليزيا السابق، عن زوجته عارضة الأزياء الروسية أوكسانا فوفودينا، نشرت الأخيرة صور طفلها الرضيع عشان تأكد الشبه الكبير اللي بينه وبين والده وقالت "هو ده أميرنا".

الطلاق كان اتأكد في شهر يوليو اللي فات، بعد أخبار متواترة عن الحدث وأسبابه، وتصريحات للزوجة بتقول فيها إنها مازالت مرات الملك وماحصلش طلاق، وإصرارها على نشر صور لها معاه طول الوقت، لحد ما أكد محامي الملك الخبر وإنه طلقها طلاق نهائي.

الكلام المتداول كان بيقول إن سبب الطلاق هو صور إغراء تم نشرها للعارضة الروسية قبل جوازهم، وهو صرح إنه مش مقتنع إن الطفل يبقى ابنه، عشان كده هي نشرت الصورة عشان تبين الشبه الكبير اللي بين الولد والملك الماليزي، لكن هو استنكر تصرفها وقال إن ده مش معناه حاجة وإنه ممكن يكون ابن اي راجل آسيوي تاني، ورفض عرضها بعمل تحليل DNA.

محمد الخامس كان اتنازل عن عرشه بشكل مفاجيء في يناير اللي فات بعد مرور أقل من سنتين على بداية حكمه، للمرة الأولى في دولته من وقت استقلالها عن بريطانيا،  وتداولت أخبار عن إن حياته الخاصة وجوازه هو السبب لكن ما طلعش تصريحات رسمية بحاجة زي دي.

يُذكر إن دور الملك في ماليزيا بيعتبر رمزي، والنظام هناك هو إن السلطة بتتقسم بين تسع مناطق، حاكم كل واحدة فيها بيكون الملك لمدة خمس سنين.

Comments: