مايكروسوفت قللت أيام العمل لـ 4 في الأسبوع: الإنتاجية زادت 40 في المية

05/11/2019

أعلنت شركة في اليابان تابعة لشركة Microsoft إن الإنتاجية عندها زادت بنسبة 40% بعد ما قللوا أيام العمل الرسمية لـ 4 أيام بس في الأسبوع وادوا الموظفيين 3 أيام إجازة.

التجربة دي كانت من ضمن برنامج أو مشروع صيفي اسمه "تحدي اختيار العمل عشان الحياة" وهدفه هو إن الناس يحافظوا على حياتهم الاجتماعية في ظل ما هما بيشتغلوا وتعزيز الإنتاج عن طريق إنهم يدوا الموظفين ساعات العمل أكتر مرونة.

شركة Microsoft في اليابان كانت بتقفل مكتبها كل جمعة (ده غير إجازة السبت والحد) في أغسطس ولقوا إن نسبة الإنتاج زادت بنسبة 39.9% بالمقارنة بشهر أغسطس 2018، والشركة قالت إنها كانت بتدي موظفينها إجازة مدفوعة الأجر في فترات الإجازة.

وقالت الشركة كمان إنها قللت الوقت بتاع الاجتماع بحد أقصى 30 دقيقة للاجتماع وبتشجع التواصل بين الموظفين عن بعد، وعموما شركة Microsoft مش أول شركة تسلط الضوء على فوايد الإنتاج لما الشغل يبقى 4 أيام في الأسبوع.

ووفقا لقناة  سي إن بي سي فمؤسس شركة تخطيط عقاري اسمها "بيربيتوال جاردن"  في نيوزلندا اسمه اندرو بارنز إنه عمل تجربة مماثلة ولقى إنها فادت الموظفين والشركة ومن بعدها اعتمد إن الشغل هيبقى الشركة 4 أيام بس في الأسبوع.

Comments: