٩ مميزات لأنك ترتبط بواحدة أطول منك

06/11/2019

من الشائع إن الراجل بيدور دايمًا على البنت اللي اقصر منه، أو الأدق إنه مش بيقبل يرتبط بواحدة أطول منه، لأن الطول بيدي إحساس بالسيطرة أو الهيبة، واللي بتحسس بعض الرجالة بالتهديد، أو بالتعدي على دورهم القيادي في العلاقة، عشان كده الراجل اللي ممكن ما تفرقش معاه حاجة زي دي، بتكون دي إلى حد ما علامة على تحرره من بعض الأفكار الذكورية اللي مالهاش لازمة.

سواء إنت من النوع الأول أو التاني، جمعنالك هنا مميزات إنك ترتبط ببنت طويلة حتى لو كانت أطول منك.

1- حاجة بسيطة زي اعتمادها على نفسها في الوصول لأي حاجة في مكان عالي بيخليها عندها نزعة استقلالية في شخصيتها، ومش متعودة تبقى شخص اعتمادي، ودي حاجة مهمة لأن الاتكالية الزايدة على الشريك بتبوظ العلاقات وبتخليها تقيلة بعد وقت مش طويل.

2- ممكن تتشاركوا مع بعض التيشيرتات والقمصان والكوتشيات.

3- صبورة ومتعودة على التفاصيل المزعجة لأنها طول عمرها بتواجه مشكلة إنها تلاقي المقاس المظبوط عليها في اللبس أو الجزم.

4- خطواتهم في المشي عريضة مش هتحس إنك بتتمشى مع جدتك!

5- دايمًا عندهم تفصيلة مميزة في شكلهم زي رجلين جميلة عشان طويلة، ماشية مميزة، أو كتافها وعضمة الترقوة اللي من علامات الجمال واللي بتبقى جذابة أكتر عليهم.

6- بتلفت الانتباه دايمًا في أي مكان تكون فيه، وسهل تلاقيها في الزحمة.

7- أحسن واحدة تاخد سيلفي.

8- لو هزرت معاها على طولها وردت عادي على هزارك بتبقى شخص سوي واثق في نفسه.

9- هتقدر تحتويك.

Comments: