بالإحصائيات والدراسات.. سواقة الستات أحسن من الرجالة

06/11/2019

" ياعم دي تلاقيها ست اللي سايقة" وجمل زي دي كتير بتتقال على سواقة الستات، عموما الستات من وقت ما بقوا يسوقوا عربيات وهما بيتعرضوا لتعليقات عنصرية وسخيفة عشان سواقتهم بس فيه دراسة أو بحث جديد نشره موقع The sun البريطاني أثبت إن الستات بتسوق أحسن من الرجالة.

البحث قال إن بالرغم من حقيقة إن ستات كتير بيفشلوا في امتحان السواقة من أول مرة إلا إنهم لما بينجحوا وبيسوقوا على الطرق بتبقى سواقتهم أحسن من الرجالة وسواقتهم أكتر أمان كمان.

موقع Confused.com لقى إن الموضوع لما بيبقى متعلق باختراق قوانين الساقة بمعنى إن عدد الرجالة اللي بيخترقوا القانون أربع أضعاف الستات، وإن نسبة الستات اللي تم إدانتهم بالسواقة المتهورة أقل من 1% في حين إن الرجالة اللي بيتم إدانتهم بالسواقة المتهورة 2%.

ونسبة عدد الستات اللي بتسوق وهي شاربة كحول 1% في حين إن بالمقارنة مع الرجالة فنسبة الرجالة اللي بتسوق وهي شاربة 5%، وما بين 600 ألف مخالفة سواقة تم تحريرها في إنجلترا وفي "ويلز" السنة اللي فاتت، فالرجالة ارتكبوا حوالي 79% من المخالفات دي.

في الحقيقة يعني إن الموضوع لما بيتعلق بالمخالفات والجرايم، الرجالة بيسيطروا على النسبة الأكبر في الأبحاث اللي زي كده، وفي 2018 كان فيه 1.4 مليون طلب تأمين ولقوا إن الرجالة بيقدموا على التأمين أكتر من الستات بحوالي الضعف.

وعلى مر التاريخ الستات بتدفع أقل من الرجالة في فلوس تأمين العربيات، وده لإنهم بيعتبروا سائقات أكتر أمان حتى كمان من الناحية الإحصائية، وعموما البحث أكتشف إن الستات قاسيين على نفسهم أكتر، بنسبة 7 من 10 بيبقوا قاسيين على نفسهم عشان بيبقوا خايفين من فشلهم في الشغل أو كأمهات.

Comments: