١٠ تصريحات قالها هيثم أحمد زكي قبل وفاته

07/11/2019

فجر يوم الخميس 7 نوفمبر توفى الفنان الشاب هيثم أحمد زكي ابن النجم الراحل أحمد زكي، ومن الجدير بالذكر إن يوم وفاته هو يوم قريب جدا من ذكرى وفاة والده اللي بتوافق يوم 18 نوفمبر وكتب ناس كتير على السوشيال ميديا إن وفاة هيثم أحمد زكي صدمة وكأن أحمد زكي مات تاني، رحيل هيثم صدم  الكل لإنه ماكنش بيعاني من أي أمراض سابقة وكان متفق على أعمال فنية الجاية .

أول أدوار هيثم أحمد زكي كانت في فيلم "حليم" وبعدها عمل فيلم بطولة مطلقة له وهو فيلم "البلياتشو" ووقتها ناس قبلته وناس تانية انتقدته لإنهم شافوا إنه بيمثل لإنه ابن فنان كبير وداخل المجال بالواسطة، بس بعد كده هيثم اشتغل على نفسه وشارك في أدوار صغيرة زي مسلسل الجماعة، وبدأ أدوار بطولة جماعية زي مسلسل دوران شبرا وفيلم كف القمر، والجدير بالذكر إن أخر سنة ظهر الفنان في أعمال كتير كان منها مسلسل علامة استفهام ومسلسل كلبش وفيلم الكنز 2.

هيثم أحمد زكي كان له تصريحات كتير متعلقة بحياته الفنية والشخصية وعن والده وكان منهم:

1- "حليم" كنت بعتبره حالة استثنائية كنت جاي بنقذ موقف ووالدي كان عايز الفيلم يكمل وكنت شايف إن هو ده الصح.

2- عملت فيلم "البلياتشو" وابتعدت 3 سنين لإني اتهاجمت جامد جدا من الصحافة وثقتي في نفسي راحت تقريبا واقتنعت إني ممثل فاشل وقعدت 3 سنين خايف أزور حد في لوكيشن.

3- أنا بعتبر بدايتي الحقيقية من أول كف القمر حسيت إني ابديت أبقى "بروفيشنال" وأبقى مش مجرد واحد جابوه عشان والده، وخدت خبرة كمان في إزاي أتعامل مع الناس في اللوكيشن، وإزاي أحضر للشخصية وإزاي ابني تاريخ للشخصية، وأستاذ خالد يوسف هو اللي علمني الحكاية دي.

4- أنا بعمل مجهود مضاعف، إني طول الوقت عايز أثبت إني ممثل كويس وأثبت إني أستحق أمثل، مش عشان أنا بس ابن الفنان الراحل أحمد زكي.

5- فيه مشروع موجود إني أعمل فيلم كابوريا 2، وأنا شايف إن المشروع كويس بس لسه بيتعمل، بس لسه الأول لما اقعد مع أستاذة سحر رامي والأستاذ عصام الشماع.

6- كان فيه هوجة على أي توريث إن أي توريث غلط، مع إن مش شرط فلو الموهبة موجودة الفنان هيكمل لو مش موجودة الجمهور مش هيستحمله، وفي أي مجال يعني.

7- عمري ما روحت لحد وقولتله شعلني أو استغليت علاقته بوالدي، الحمد لله إني قادر أكمل بس لازم اتخض لما بيقارنوني بأحمد زكي هو كان في التمثيل عبقري يعني، وكل الأساتذة الكبار أبناءهم لو اتقارنوا بيهم هيتظلموا.

8-  فيه أدوار كتير نفسي أعملها، نفسي أعمل ظابط ونفسي أعمل ملاكم لإني حاسس إني هعمله بطريقة تانية وفيه تحدى عشان والدي عمل 3 ملاكمين، وأنا كنت عايز أعمله بطريقتي، شايف حاجة أقدر اعملها في الدور ده، ولو فكرت إن بابا عمل دور معين فمش هعمله أنا كده مش هعمل حاجة خالص.

9- والدي كان لما بيشوفني متأثر بيه أو بشخصية عملها في فيلم كان بيقولي ابحث عن ذاتك إنت عندك أحاسيس تهد الدنيا، ونصايحه في الحياة أكتر ما هي في الفن.

10- كل يوم بليل لازم أعيش مع والدي شوية، مع الصور، مع الأفلام، مع الذكريات، بكلمه.

Comments: