٦ أسباب يخلوك ترتبط بحد معاك في الشغل

07/11/2019

من الحاجات المعروفة إن الارتباط بحد معاك في الشغل هو نوع من التوريط لأسباب كتير، زي إن ممكن الموضوع ما ينفعش وما تقدروش تستحملوا وجود بعض في نفس الشغل، تصرفاتكوا الشخصية أكيد هتأثر على مستوى الآداء خصوصًا بردو لو الموضوع تأزم وماكملش، هتزهقوا من بعض لأنكوا كده مع بعض في كل حتة وعايشين نفس الحاجات فمفيش جديد..إلخ.

طبعًا ده كفيل إنه يقفلك من الحكاية ويخلي دماغك أما تلعب أو تفكر في زميل ليك تقول لنفسك مالوش لزوم وخلينا في الأمان أحسن! بس هي الصورة مش سودا تمامًا كده، وعلى الجانب التاني النوع ده من العلاقات ممكن يكون له مميزات، واللي يمكن لو عرفتها تلاقيها أهم بالنسبة لك من العيوب اللي فاتت، وتشوف إن الموضوع كده كسبان.

زي إيه بقى؟

1- هيبقى عندك حافذ إنك تقوم الصبح وتروح الشغل، وهو حد مهتم بيه وعارف إنه هو كمان مهتم بيك.

2- زمايلك في الشغل دي الناس اللي بتشوفك كل يوم، يعني شافوك وانت مودك حلو ووانت مودك وحش، وانت مهتم بنفسك ووانت جاي من السرير على المكتب على طول مش طايق نفسك، يعني إلى حد كبير الشخص اللي هتختار ترتبط بيه ده هيكون شافك بشكل حقيقي وشاف عيوبك واختارك بردو.

3- الشخص اللي معاك في الشغل بيتكلم نفس لغتك وهيبقى فاهم مشاكلك وحكاياتك لأنه بيمر معاك بنفس الحاجات كل يوم.

4- إنت بتقضي معظم وقتك في الشغل يعني فطار وغدا وأحاديث يومية ومشاركة في الأحزان والأفراح بتعملها بشكل روتيني مع زمايلك، لكن بتكون تفاصيل جميلة لما اتنين يتشاركوا فيها مع بعض، وبتبقى باب إنهم يعرفوا بعض كويس وذكريات مميزة.

5- لو إنت مش شخص اجتماعي أوي هيفرق معاك وجود واحد قريب منك يدعمك ويهون عليك وقتك في الشغل.

6- شغله في نفس المكان والمجال معناه إن على الأقل فيه أرض مشتركة في اهتمامتكوا.

Comments: