١١ علامة رصدها منظمين الأفراح: الجواز ده هينتهي بالطلاق

07/11/2019

أي اتنين بيقرروا يتجوزوا بيبقوا عارفين إنهم ممكن يكملوا مع بعض العمر كله وبيبقوا شايفين الدنيا مليانة قلوب وفراشات وإنه Forever وكلام الأفلام ده كله، بس الناس اللي حواليهم بيبقوا شايفين حاجات وإشارات بتدل على إن الجواز ده صعب يكمل أو إنهم في وقت ما هيتطلقوا، وأكتر ناس ممكن يبقوا برا الصورة ويشوفوا التفاصيل والإشارات الصغيرة اللي بتدل إن الكابل دول مش هيكملوا هما الناس اللي بتعاملوا مع عرسان كتير زي منظمين الأفراح، أو الـ Wedding Planners.

موقع best life online اتكلم مع منظمين أفراح كتير لإنهم بيقضوا أسابيع بيتعاملوا مع نفس الكابل وبيشوفوا إزاي ممكن يعدوا أزماتهم وإزاي ممكن يقدموا تنازلات عشان بعض وإذا كانت العائلات متشابهة ولا لا، وتحديدا في فترة قبل الجواز اللي بيكون فيها التوتر والضغط في أعلى مستوياته.

منظمة الأفراح مايا ديفيري تاراش من شيكاغو، قالت إن تحضير الأفراح مهمة صعبة وفي نفس الوقت مثيرة لإنها بتستنزف الكابل من الناحية المادية والعاطفية ومنها معادن الأشخاص بتبان، وفيه كذا مصمم أفراح قال كذا علامة بتدل على إن الكابل دول مش هيكملوا بعض أو هيتطلقوا بعد فترة زي:

1- الكابل مش بيتواصلوا بكفاءة:

"تاراش" قالت إن تفاصيل الفرح بتبقى كتير جدا من المرجح إن الطرفين مايوافقوش عليها كلها، لكن اللي بيفرق إزاي ممكن يتعاملوا مع الوضع، في الغالب مابيتفقوش الطرفين على تفاصيل الحفلة ولكن لما بيكون فيه تواصل بيقدروا يوصلوا لبعض أفكارهم وبيبقى أحسن كمان لو حد من الطرفين قدم تنازل لإن غالبا لما ماحدش بيقدم تنازل بتبقى علامة مش كويسة على المدى البعيد.

2- الطرفين بيبقى عندهم اهتمام زايد بالتفاصيل:

المصورين "روبرت وكريستين تيسار" في ولاية كارولينا الشمالية، أكدوا إن الكابل لما بيختلفوا كتير على التفاصيل غالبا جوازهم مابيدومش كتير، وقال "روبرت" إن أكتر علامة بتبقى باينة هي لما الطرفين بيقضوا وقت طويل جدا في التركيز في التفاصيل لإن ده بعد فترة بيخليهم تعسا.

3- تدخلات الأهل:

الفرح بيبقى أكتر حاجة مهتم بيها الطرفين بس عموما لما الأهل بيتدخلوا فيه بنسبة كبيرة بتكون علامة سيئة،  كيندال جراهام بتقول إن كان عندها عروسة حجزت فرحها وبعد 3 شهور من الحجز لغت فرحها لإن أهل العريس مش عايزين المكان ده.

4- لما يبقى فيه طرف مش مهتم بالتفاصيل خالص:

بالرغم من إن الانغماس في تفاصيل الفرح بزيادة مش أحسن حاجة عشان الناس بتركز على اليوم أكتر من الأشخاص اللي هيقضوا معاه حياتهم إلا إن لما بيبقى فيه طرف مش مهتم بالتفاصيل دي برضه علامة سيئة، إيمي ماكورد جونز، بتقول إن أكيد الرجالة صعب تركز مثلا في الورد اللي هيبقى في الفرح بس على الأقل يبقى مركز وداعم لشريكته، مش يبقى واخد أداء إن طالما فيه أكل في الفرح خلاص كله تمام ويبص في الموبايل مثلا، وقالت كمان إن الطريقة دي في التعامل بتجرح شعور العروسة وبتحسسها إن يوم فرحها مش مهم.

5- واحد من الطرفين سلبي أو بينتقد بزيادة:

إريك هانت بتقول إن لما بيبقى أي من الطرفين مش مهتم أو بيبقى سلبي في عملية التخطيط بيبقى مؤشر إن العلاقة بايظة، أو إن طرف من الطرفين يبقى بيشتكي طول الوقت فده أصلا بيأكد إن هتحصل مشاكل بينهم بعد كده.

6- فيه شخص فيهم بيتكلم عن تكاليف الفرح كتير:

لما بيبقى فيه طرف بيتكلم عن التكاليف والفرح كتير بيبقى علامة على إنه مش سحطي، فيه مصممة أفراح اسمها "بيريدزيلا" قالت إن فيه عروسة قالت للمعازيم إنهم لازم يبقوا ممتنين ليها لإنها عزمتهم في المكان الغالي ده، ولما جيه الوقت اللي كانت بتقطع التورتة فيه شدت المياك من ايد مصممة الفرح وقالت للمعازيم فيه يسكتوا، وقالتلهم المفروض إنهم يتبسطوا إنهم هياكلوا من التورتة يدي.

7- لما حد يبقي مديون عشان يعمل الفرح:

مفيش سبب معين يخلي الناس تتداين عشان تعمل فرح، في حين إنهم ممكن يتبسطوا بأقل التكاليف، لإن الدخول في ديون عشان الفرح مش أكتر قرار ناجح عشان تكمل بيه لمستقبلك، ده غير إنها حاجة خطر إنك تبدأ حياتك وإنت عليك ديون.

8- الكابل مش مبسوطين

طبيعي يكون في ضغط شديد بسبب التجهيزات والتفاصيل الكتيرة لدرجة إن الفرح بيبقى بالنسبة للعروسين أشبه بيوم الخلاص، بس في فترة الشد دي لو أهمل العروسين إنهم بيحبوا بعض أو غرقوا في التفاصيل للدرجة اللي تنسيهم الحاجات الرومانسية الصغيرة بينهم، يبقى الجواز مش هيستمر.

9- استقبال المعازيم والضيوف

في الفرح، وجود معازيم كتير وناس بتحبهم لكن مش بتشوفهم دايما بيديك حماس ترحب بيهم وتتكلم معاهم على الأقل في بداية الفرح أو في بداية وجودهم، لكن المهم إن العريس والعروسة يبقوا مع بعض وهما بيرحبوا بالضيوف مش كل واحد بينفصل عن التاني، كيلي ديلنجر wedding planner من كندا، قالت لـ"هاف بوست" إن انفصال العريس عن العروسة في الترحاب بالضيوف علامة سيئة وعدم احترام واعتبار لشريك الحياة الجديد.

10- فيه طرف متوتر:

مش محتمل أصلا يبقى فيه توتر في يوم مهم زي ده لإن هو يوم منتظر بالنسبة للطرفين، وزي ما قالت مصممة أفراح في  تشارلستون طلبت إن اسمها مايتقالش إن العريس أو العروسة بيتعرضوا لنوبات قلق أو ذعر فمالهاش لازمة أبدا التوتر والضغط العصبي الزيادة.

11- الأهالي مش مرتاحين لبعض

معروف إن مفيش حد حماته هتبقى بتحبه 100%، لكن لابد من وجود الحد الأدنى من التوافق والراحة والاندماج بين الأهالي وبعضها، رغم إن مش هما اللي هيتجوزوا، إلا إن عدم راحة الأهالي لبعضها علامة مش كويسة ومؤشر على إن الجواز ده هنتهي بدري بدري.

Comments: