٨ نصايح عشان تقدر تتعامل مع إحساس الوحدة

07/11/2019

الوحدة عموما من أسوأ المشاعر اللي ممكن الشخص يحس بيها وممكن يحس بيها في مواقف مختلفة، ممكن يحس بيها لما يتنقل ويعيش لوحده أو لما يفارق حد من صحابه أو شريكه أو حد من أهله،  ليزا بهار أخصائية في الزواج والأسرة من مدينة "نيوبورت بيتش" في كاليفورنيا، قالت إن مرحلة الإحساس بالوحدة دي عدى بيها كل إنسان أو مسيره يعدي بيها، لكن الحقيقة إن الوحدة ليها آثار جانبية على الصحة النفسية والجسدية زي إنه بيوصل الشخص للاكتئاب أو لإدمان الكحوليات أو السكتات الدماغية وانخفاض نظام المناعة والموت المبكر.

لما تحس بالوحدة تقدر تتخلص من الإحساس والمشاعر السيئة دي عن طريق شوية خطوات زي:

1- اعمل قايمة بالحاجات اللي تقدر تعملها بنفسك:

لو حاولت تعالج وحدتك عن طريق إنك تحاوط نفسك بالناس فالحل ده عمره قصير، لإن بمجرد ما الشخص اللي إنت مليت بيه وحدتك ده يمشي هترجع تحس بالوحدة تاني، وبدل من إنك تعتمد على وجود حد ممكن تعمل قايمة بحاجات تعملها وتستمتع بيها أكتر زي إنك تشوف أفلام أو مسلسلات أو الخياطة أو الرسم أو الكتابة، ودي الطريقة السليمة اللي بتطلع الشخص من الوحدة، وزي ما بيقولوا إننا ممكن نستغل إحساس الوحدة عشان نكتشف نفسنا، اتفرج على فيلم، روح متحف أو روح اعزم نفسك على العشا واعرف إيه ممكن تحب تعمله تاني أكتر.

2- دور على أنشطة ممكن تعملها لوحدك ويبقى معاك ناس تانيين:

ممكن تدور على نشاط بتحبه بيجمعك مع ناس بيفكروا زيك، روح مكتبات أو أندية أو events ولو مثلا عايز تتعلم الرسم أو التصوير ده وقت إنك تعمل كده، والهدف من ده هو إنك تلاقي نفسك فعلا، وحتى لو مش ده الهدف الأساسي هو إنك تكون علاقات بس الأحسن يبقى إنك تكون علاقات لو لقيت حد ممكن تصاحبه.

3- اعمل قايمة بالناس اللي ممكن تبقى معاهم لما تحس إنك لوحدك:

ممكن يبقى صديق أو حد من العيلة أو حتى حد بتشوفه كل فترة والتانية، وعشان تبقى اختياراتك مفتوحة اعمل قايمة بكذا شخص ممكن يبقوا جنبك، وبلاش تعتمد على شخص واحد لإنك ممكن تسببله ضغط وكمان ممكن مايبقاش موجود فتحس بالوحدة أكتر.

4- خليك اجتماعي في بعض الأوقات حتى لو مش دي شخصيتك أصلا:

إنك تتعرف على أشخاص جديدة دي حاجة مخيفة بالنسبة  لك وملهاش أي معنى صح؟ بس الوحدة ليها طريقتها في إنها تخلي التواصل مع الناس بارد ومالوش معنى في مرحلة ما، التصريحات الإيجابية اللي ممكن تقولها لنفسك ممكن تساعدك على إنك تبقى اجتماعي شوية وتتواصل مع الناس زي "أنا مهتم" أنا مش خايف من الرفض.

5- حاول رد الجميل:

ممكن تعمل أنشطة زي اللعب مع القطط والكلاب وإنك تزور الأشخاص المسنة أو الأيتام في الملاجئ، ساهم في المجتمع بطريقة تخليك تحس إنك راضي عن نفسك، لإن التفاعلات بتساعد الشخص يبني علاقات فعالة مع أشخاص جديدة أو حيوانات أليفة ومن غير ما تعتمد على أشخاص معينة.

6- حرك جسمك بأي طريقة لإن ده هيساعدك:

"بهار" بتقول إن الموضوع مش متعلق بالتمرينات الرياضية على قد ما هو بيشتغل على النظام الحسي والتواصل عندك، فالرياضة بتخلي الشخص بيشرك جسمه وبيلحق عقله من الإحساس بالوحدة.

7- فكر إنك تروح لدكتور نفسي:

حتى لو كنت شاكك في قيمة الدكتور النفسي ومش مقتنع بالعلاج، لكن الموضوع مفيد لإن حد هيسمعك وهيقدرك، لإن ساعات الموضوع بيبقى متعلق بإنك عايز شخص يسمعك بس وده مهم جدا.

8- افتكر إن الوحدة إحساس مؤقت:

حتى لو كنت حاسس بالوحدة دلوقتي فده مش معناه إنك هتحس بالوحدة طول عمرك، إنت هتعمل علاقات جديدة وهتخرج تاني بس كل اللي محتاج تعمله إنك تعدي الفترة دي وتعمل علاقات جديدة.

Comments: