دراسة: الشاي بلبن بيدمر مضادات الأكسدة وبيعمل انتفاخ

09/11/2019

أكتر من 2 مليار شخص في العالم بيحبوا الشاي وبيشربوه يوميا، يمكن مش بيشربوه عشان فوايده الصحية أو دوره في تحسين أداء الأوعية الدموية لكن بيشربوه حبا في طعمه، وزيادة في الاهتمام بالطعم في عدد كبير من الـ 2 مليار بني آدم دول، بيحطوا على الشاي لبن، ورغم إن كل مشروب منهم مفيد جدا لوحده، إلا أن الشاي بلبن على بعضه، مشروب غير مفيد بالمرة، بالعكس، هو بيضر جسمك وصحتك.

موقع HealthStatus وموقع FOOD العالميين، اتكلموا عن دراسة اتنشرت في European Heart Journal واتكلمت عن أضرار إضافة اللبن على الشاي، وعموما، الشاي لوحده غني جدا بمضادات الأكسدة والفيتامينات وبيقوي الجهاز المناعي وبيساعد في ظبط مستوى السكر في الدم، والتقليل من تلف الخلايا، ومقاومة أمراض القلب والأوعية الدموية.

لكن إضافة اللبن على الشاي بتخلي المشروب الناتج حمضي أكتر، أو بدرجة حمضية عالية، وده مؤذي للجسم، ده غير إن اللبن بيعطل عمل مضادات الأكسدة الموجودة في الشاي أو بيأجل عملها وبيبطئها، بالإضافة لتعطيل عملية الحرق والتسبب في جفاف الجسم، وممكن عند ناس كتيرة يتسبب في الانتفاخ.

وأكدت دراسة جورنال القلب الأوروبية، إن اللبن بيعطل النشاط الحيوي اللي بتعمله مكونات الشاي، بما فيهم مضادات الأكسدة، وده بيحصل بنفس الدرجة سواء كان الشاي أخضر أو أسود. 

Comments: