٩ أسباب بتخليك كل ما تخلص "فريندز" تتفرج عليه من الأول تاني

11/11/2019

"فريندز" بالنسبة لناس كتير مش مجرد مسلسل، بس هو الحاجة اللي ممكن أما تحب تعتزل الحياة وتقعد في بيتك تكتفي بيها، واللي ترفض كل المسلسلات الجديدة عشان تقعد تتفرج عليه تاني من الأول كأنها أول مرة، ومع الوقت مابقاش اسمه مسلسل بتفرج عليه بقوا أصحابنا وجزء من حياتنا، ليه؟

1- عشان المسلسل مش بيقدم أي شخصيات خارقة أو مميزة، مجموعة أصحاب عاديين بيشبهونا في حاجات كتير وبيتحطوا في مواقف أزمات فيها من حياتنا طول الوقت.

2- كلهم بيرتكبوا حماقات بنعملها في حياتنا كل يوم بيخلوك تضحك على نفسك وتتصالح معاها.

3- المسلسل مالهوش قفلة حتمية لكل حلقاته، إن فيه لغز لازم هيتحل، أو أشخاص أكيد هتنتصر، إنت ماشي معاهم زي ما ماشي في حياتك، مستني تشوف هيتصرفوا إزاي، ويوم نجاح ويوم فشل.

4- مفيش قوالب مُطلقة للشخصيات، إن ده غبي طول الوقت وده غبي طول الوقت، كل واحد له وقت بيبقى مرغوب ومميز ووسيم وله وقت بيبقى أحمق ومش عارف يتصرف ومرفوض من حد بيحبه أو من شغل.

5- الحوارات كلها سهل ممتنع، بتعبر عن أدق المشاعر والأفكار والخيالات، واللي أحيانًا بتبقى تافهة، لكن التعبير عنها عايز براعة كبيرة وذكاء حقيقي في الصياغة بيخلي حاجة تنور في مخك أما تلاقي تفصيلة عبيطة من حياتك حد مبلورها وبيقولها في شكل جملة مفيدة.

6- الحلقات محافظة على جو واحد حتى في اللحظات الدرامية والمأسوية ما بيطلعش عن الأجواء الاجتماعية الكوميدية عشان كده مناسب جدًا إنه ما ينكدش عليك حتى لو كانت القصة اللي حاصلة بتلمسك أو بتدوس على جرح عندك.

7- في نفس السياق الحلقات محافظة بردو إنها مش بتخرج عن تركيزها على القصص الاجتماعية والعاطفية الخاصة بشلة أصدقاء، مش بيدخلك في متاهات وقصص فرعية، ولا حتى الأماكن بتتغير كتير.

8- إنت عايش معاهم تفاصيل التفاصيل فحتى التصرفات اللي ممكن تبقى مرفوضة اجتماعيًا في شكلها من برة زي إن واحد يحب واحدة كان مرتبط بيها صاحبه، أو واحدة دايمًا تحن للشخص اللي كانت مرتبطة بيه لما تلاقيه راح لحد جديد، إنت بتشوف مشاعرهم وأفكارهم بتتطور إزاي وبتبقى مقدر موقف كل واحد وده بيخليك إنت كمان تتعرف على نفسك أكتر وتقدر غيرك لو في مواقف مشابهة.

9- التنوع في شخصياتهم والقصص اللي بيمروا بيها بيخليك على ما بتعدي على العشر أجزاء بتبقى مريت بكل الروابط والعلاقات الإنسانية الموجودة في حياتك، علاقتك بأهلك، بأصحابك، والعلاقات العاطفية بأشكالها سواء اللي فيها مشاعر جياشة، أو مؤقتة، أو "ريباوند"..إلخ.

Comments: