القصة الكاملة لحريق خط بترول إيتاي البارود

14/11/2019

شهدت قرية إيتاي البارود امبارح أوقات عصيبة بعد اندلاع حريق في خط بترول بيمر في القرية، نتج عنه وفاة 7 أشخاص وإصابة 15، وتمكن قوات الحماية المدنية من السيطرة على الحريق في النهاية.

وكان أهل إيتاي الباردو بلغوا على حريق كبير في خط بترول جاي من القاهرة لإسكندرية، تابع لشركة طنطا للبترول، وقالوا إنه بالفعل المواسير كان فيها تسريب، واستغاثوا بالمسؤولين في محافظة البحيرة عشان يقفلوا المحبس الرئيسي، وعملت قوات الحماية المدنية تطويق كبير لتجنب وقوع إصابات بعد ما قالوا إن الأهالي اتعاملوا بشكل خاطيء مع الحريق.

في نفس السياق صرح المهندس عبدالمنعم حافظ رئيس شركة أنابيب البترول إن الساعة واحدة تم رصد محاولة سرقة لخط منتجات بترولية بإيتاى البارود، عن طريق تركيب كلبس في المواسير نتج عنه تسريب البنزين على الأرض وفي الترعة اللي جنبها، وراح على طول فنيين لمكان المشكلة وقفلوا المحابس المحيطة بالكسر وسيطروا على التسريب وبلغوا البوليس، لكن وصلت نار من مصدر مجهول للبنزين المتسرب واتسبب في اندلاع الحريق.

حسب جريدة الوطن شهود العيان بيقولوا إن محاولة السرقة تمت الساعة 11 الضهر، وإن حد حاول يخرم الماسورة عشان يسرق بنزين لكن اتكسرت وضربت فيه فساب كل حاجة ومشي، وحوالي الساعة خمسة حصل انفجار نتيجة لأن حد رمى عقب سجارة في الأرض اللي عليها التسريب.

وزارة الصحة والسكان أعلنت إنها بعتت حوالي 20 عربية إسعاف لنقل المصابين واللي حالاتهم بتتنوع بين حروق بدرجات مختلفة وحالات اختناق، وقام محافظ البحيرة اللواء هشام آمنة بزيارة مستشفى إيتاي البارود العام عشان يتطمن على المصابين، وطلب من مديرية التضامن عمل حصر للضحايا والمصابين عشان يتم صرف تعويضات لهم، بجانب إنه تم التحفظ على صاحب الأرض لحين معرفة تفاصيل الوقعة والتأكد من سبب الحريق.

Comments: