منصة "ديزني+" تتبرأ من العنصرية في أفلامها القديمة

14/11/2019

بدأت منصة "Disney+" بإرفاق إشعار مع كل أفلامها بتوضح فيه إن المحتوى ينتمي لفترة سابقة وبيعبر عن شكل ثقافة مختلفة عن الثقافة الحالية، وده عشان تتبرأ من أي محتوى يبدو عنصري كان في أفلامها اللي بتعتبر من الكلاسيكيات.

على سبيل المثال فيلم "Dumbo" كان فيه شخصية اسمها "جيم الغراب" وكانت بتتكلم باللهجة الأمريكية اللي بيتكلمها أصحاب البشرة السمرا هناك، وشيء مشابه في فيلم "Lady and the Tramp" واللي قدم قطط سيامي بتتكلم بلهجة ساخرة بتقلد ابناء شرق آسيا، وكل اللي كانوا بيأدوا الأصوات دي ممثلين من أصحاب البشرة البيضا، الشيء اللي اختلف دلوقتي وأصبح فيه وعي ورقابة كبيرة عليه.

من ناحية تانية استقبل الناس الخطوة دي من ديزني بحفاوة كبيرة وقالوا إنها بتتحمل مسؤولية أخطاء الماضي، نفس الحاجة عملتها "Warner Bros" الشهيرة المنتجة لـ "توم وجيري" اللي بقة بتقدم مع كل الحلقات توضيح إن حاجات كتير من المحتوى كانت "غلط في وقتها وغلط دلوقتي".

Comments: