٩ حاجات ممكن تعملهم أما تروح إسكندرية في الشتا

18/11/2019

إسكندرية بالنسبة لناس كتير يعني بحر سواء صيف أو شتا، وأكيد دي حاجة ما يختلفش عليها اتنين، بس بجانب إنك تروح وتنزل الميه في الصيف أو تقعد على الشط في الشتا ممكن تعمل إيه؟

فكرة الكافيهات والأماكن الشهيرة مش أحسن اختيار ممكن تعمله أما تروح أي بلد في زيارة عابرة، لأن ببساطة إنت ممكن تعمل كده في بلدك، لكن اللي هيحسسك إنك زرت بلد بالفعل هو إنك تشوف الحاجات المميزة اللي فيها بتعمق مش مجرد زيارة سياحية، ودي شوية حاجات من اللي ممكن تعملها.

1- قصر المجوهرات في زيزينيا مكان مهدور حقه، لكنه في غاية الجمال، سواء من ناحية المعمار أو المعروضات من مجوهرات أسرة محمد علي، ومهم أما تروح تطلب مرشد يلف معاك المكان عشان يلفت نظرك لتفاصيله، زي القصة المصورة بالإزاز المعشق في الممر الواصل بين الجناح الشرقي والغربي، والديكورات الموجودة في كل قاعة واللي بتكون لها علاقة بالهدف المعمول عشانه القاعة إذا كانت للأكل أو السهر والموسيقى، وفي الغالب لو جمعتها مع بعض هتكون قصة.

2- المسرح الروماني في كوم الدكة، وعلى الرغم من إن يعتبر اللي فيه بقايا لكن لو قريت بشكل سريع عنه أو لو كان معاك مرشد، هتعرف قصته وهتتخيله بشكل مختلف كأنك أول مرة تشوفه! المنطقة اتسمت كوم الدكة نسبة للمسرح المكون من دكك فوق بعضها، والمكان مش بس فيه المدرج ده، لكن فيه بقايا مباني بيقال إنها كانت مجمعات سكنية بتشمل غرف مذاكرة وحمامات "ساونا"، وفي النهاية فيه فيلا الطيور اللي هتشوف فيها البقايا الموجودة من أرضيات بيوت كانت موجودة في المكان وكلها من الموزاييك "الفسيفساء" وعلى شكل طيور.

3- مكتبة إسكندرية تبدو زيارة تقليدية، لكن ضخامتها محتاجة منك جولة متعمقة ممكن تحجزها من مكتب الاستقبال، تشوف فيها كل أقسام المكتب وتفهم فكرة بناءها وطريقة تقسيم الأدوار فيها، بجانب زيارة المتاحف زي متحف شادي عبد السلام اللي حتى لو إنت مش مهتم بالفن هتنبسط بالمعروضات اللي فيها تصميمات "عبد السلام" لملابس عدد من الأفلام الشهيرة جنب صورة الفيلم بعد ما اتنفذ!

كمان ممكن تزور متحف الآثار واللي هتمر من خلاله في جولة هتشوف فيها تخيل لكل العصور اللي عدت على مصر مع شرح جنب كل قطعة.

4- لو اتجهت لكرموز خليه مشوار واحد وروح كوم الشقافة واللي فيه مقبرة هتستمتع بإنك تزورها لأنها من الأماكن اللي محافظة على وجود رسومات وحفر على الحوائط وتماثيل حالتها جيدة جدًا، وبعدها ممكن تكمل وتروح عمود السواري وتشوف بقايا معبد السرابيوم اللي كان موجود في المنطقة دي.

5- القهاوي في إسكندرية لها طعم مالهاش علاقة بإنك غني أو فقير، عشان كده اهتم تقعد على التجارية أو علي الهندي في المنشية هتحس فعلًا بالتغيير.

6- المركز الفرنسي في شارع النبي دانيال من الأماكن اللي ممكن تستمتع فيها بقاعدة لطيفة في الهوا وتتابع جدول الحفلات والفعاليات عندهم هتلاقي حاجات كتير ممكن تحضرها وتقعد قبلها أو بعدها شوية في المكان.

7- مش محتاج تعرف إن وإنت في النبي دانيال دي فرصة كويسة إنك تتمشى وتتفرج على الكتب هتلاقي حاجات كتير من التراث موجودة هناك.

8- في بداية شارع فؤاد ونهايته فيه مكانين ممكن تروحهم، وهما مركز الحرية للإبداع واللي بيقدم باستمرار فعاليات ثقافية وفنية وعروض أسبوعية لأفلام حديثة وقديمة، والتاني هو المتحف القومي وهتشوف فيه مجموعة تانية من الآثار اللي مش موجودة في متحف المكتبة بالإضافة لجمال القصر اللي كان ملك تاجر غني اسمه "أسعد باسيلي" بناه على الطراز الإيطالي.

9- طبعًا أخيرًا اتمشى على البحر كتير.

Comments: