١٠ مواقف تثبت إن سما المصري "attention seeker": غير حجاب مهرجان القاهرة

21/11/2019

إمبارح الأربع 20 نوفمبر كانت حفلة افتتاح مهرجان القاهرة السينمائي لدورته الـ 41 وطبعا كان فيه سباق الفنانات بالفساتين على الريد كاربت، لكن حصل حاجة غريبة جدا شدت السوشيال ميديا وخلت كل الناس تتكلم عليه في المهرجان وهي إن سما المصري حضرت المهرجان بفستان مقفول وحجاب، بغض النظر إن الأمن مارضاش يدخلها المهرجان لكنها ظهرت في صور على السوشيال ميديا وهي داخله المهرجان بالحجاب.

أغلب الناس على السوشيال ميديا انتقدوها وأغلب الكلام اللي كان عن المهرجان والتكريمات والفساتين الحلوة اتحول للكلام على سما المصري حتى لو بالانتقاد، وده اللي خلى ناس كتير تحس إن الحركة دي كانت مقصودة منها عشان تلفت الأنظار وتخلي الناس تاخد بالهم منها وتبقى حديث الناس على السوشيال ميديا، وعشان كده ممكن نقولك مواقف كتير زي دي تثبت إن سما المصري "اتنشين سيكر":

1- سما المصري جمعت الميمز اللي اتريقت عليها بعد صورة الفستان والحجاب وكتبت عليها على صفحتها على الفيسبوك "من فوق حجاب ومن تحت ورايا يا شباب"

2- أغلب الصور اللي سما المصري بتنشرها على حسابها وصفحتها بتكون صور مستفزة للجمهور ومثيرة سواء كان بحركاتها أو بلبسها 

3- بتهاجم أي حد من الناس المشهورة على حسابها برضه وأهم حاجة عندها تتكلم عن التريند.

4- قالت في فترة ما إنها هتعمل برنامج تلفزيون في رمضان والبرنامج هيكون برنامج ديني وكان هيبقى اسمه "أهل العلم".

5- عملت فيديو وانتشرت على مواقع التواصل الإجتماعي بتغني فيه أناشيد وأدعية إسلامية وكانت برضه لابسه الحجاب فيه.

6- بترد على متابعينها على مواقع التواصل الاجتماعي واللي بيشتمها بتشتمه.

7- سما المصري بتشوف الناس راحة يمين تروح شمال أو العكس، يعني الناس في المهرجان بتلبس فساتين مفتوحة فهي هتروح بالحجاب وصرحت وقالت إن ده شوو وإنها مالبستش الحجاب ولا حاجة.

8- بتعمل فيديوهات على قناتها على اليوتيوب وهي بتغسل مثلا وبتقنع الناس إنهم لازم يغسلوا على ايدهم أو وهي بتستحمى والفيديو وهي في البانيو. 

9- في وقت ماتشات كاس الأمم الأفريقية راحت بلبس ملفت الاستاد وانتقادها ناس كتير وبالرغم من ده نشرت صورها على الأكونت بتاعها عادي، والأمن خرجها من المدرجات.

10- ظهرت في فيديو وهي لابسه فيه بنطلون "ليجن" عليه علم أمريكا والفيديو كان بمناسبة إنها ماعهاش فلوس تنزل تجيب فستان تروح به الاستفتاء وإنها مش هتقدر تنزل بالبنطلون اللي عليه علم أمريكا.

Comments: