اكتشاف السكريات في النيازك دليل جديد على مشاركتها في تشكيل الحياة على الأرض

25/11/2019

افترض الباحثين والعلماء من زمان إن النيازك اللي نزلت على الأرض في بداية الكون، كان فيها مواد ومكونات رئيسية عشان تخلق الحياة على الأرض، ومع الوقت اتأكدت الافتراضات دي بعد دراسات كتيرة عن مكونات النيازك، واللي أثبتت آخر دراسة منها إنها بتحتوي على أكتر من نوع "سكر"، وده بيدعم أكتر النظريات القديمة اللي بتقر إن النيازك والتفاعلات الكيميائية داخل الكويكبات اللي بتصنع النيازك، ساعدت على تكوين مواد أساسية على الأرض ونشأة الحياة عليها.

فيه دراسة اتنشرت يوم 18 نوفمبر في "Proceedings of the National Academy of Sciences of the United States of America" وقالوا إنهم حللوا 3 نيازك منفصلة بما فيهم نيزك بيعود لمليارات السنين، واستهدفت الدراسة البحث عن السكر في النيازك اللي هبطت على الأرض واستخدموا تقنية جديدة بيستخدموا فيها حمض الهيدروكلوريك والمياه.

وبعد تحليل النيازك، اكتشفوا وجود سكريات حيوية أساسية زي "أرابينوز" و"زيلوز" (سكر الخشب)، والأهم هو اكتشافهم مادة "الريبوز" (جزيء سكر)، اللي هي مكون أساسي في البيولوجيا البشرية، ووضحت "ناسا" في بيان صحفي وقالت إن "الريبوز" هو مكون حاسم في الحمض النووي الريبي (RNA) وقالوا إن في الحياة الحديثة بقى الحمض النووي الريبي مرسال فهو بينسخ التعليمات الوراثية من جزء الحمض النووي (حمض الديوكسي ريبونوكليك) وبيوصلها لداخل الخلية الجزئية واللي بتسمى بـ"الريبوسومات " وبتقرا الحمض النووي الريبي عشان تبني بروتينيات معينة ضرورية لعملية الحياة.

ووفقا للبيان الصحفي ده فالـ"DNA" هو قالب الحياة بيحمل كل الإرشادات وخواص كل كائن حي، وبالرغم من كده العلماء بيقولوا إن الحمض النووي الريبي تم تكوينه الأول وبعد كده اتطور وبقى الحمض النووي، وده عشان جزيئات الحمض النووي الريبي عندها قدرات بيفتقرها الحمض النووي، فهو ممكن يعمل نسخ من نفسه من غير مساعدة جزيئات تانية، وممكن برضه يبقى محفز فيبدأ أو يسرع تفاعلات كيميائية.

وأضاف مؤلف الدراسة الرئيسي يوشيهيرو فوروكاوا، من جامعة "توهوكو"، وقال إن تم العثور على مواد تانية مهمة في النيازك زي  الأحماض الأمينية (مكونات البروتينات) والقواعد النووية (مكونات الحمض النووي والحمض النووي الريبي)، لكن السكريات كانت مفقودة بين مجموعات ومواد الحياة الأساسية، لكن البحث كده بيقدم دليل أساسي ومباشر إن مادة الريبوز (السكر) كانت موجودة على الفضاء ونزلت الأرض بسبب النيازك، وده معناه مساهمة النيازك دي في نشأة الحياة على الأرض.

وفي يناير 2018 اكتشف العلماء المكونات الأساسية في النيازك بما فيهم الأحماض الأمينية والهيدروكربونات ، والمواد العضوية ، وآثار المياه السائلة، وكلها مواد أساسية ومشاركة في تكوين الأحماض النووية، وبالتالي مساهمة النيازك دي في تشكيل الحياة على سطح الأرض.

Comments: