اكتئاب ما بعد الفركشة.. أعراض مرض نفسي ممكن تستمر لـ 6 شهور

28/11/2019

الفركشة أو البريك أب بيجروا وراهم فترة ممكن تطول من عدم الاستقرار العاطفي والمشاعر المتضاربة والحزن والندم، بعض الناس بتقدر تتجاوز المشاعر دي بسرعة وتـ Move on وناس تانية بتفضل بتعاني أحيانا لسنين من مشاعر زي الغضب والمرارة والحزن والضيق والندم وعدم الثقة، طول المدة اللي بيفضل خلالها الشخص يعاني من مشاعر ما بعد الفركشة، اللي هي بتتحدد إذا كان هو بيمر بالمرحلة الطبيعية بعد الانفصال، ولا مصاب بـ"اكتئاب ما بعد البريك أب".

موقع VeryWell Mind المتخصص في الصحة النفسية، قال إن في دراسة أثبتت إن الأعراض الناتجة عن المشاعر اللي بيمر بيها الشخص بعد "البريك أب" متشابهة إلى حد كبير جدا مع أعراض مرض الاكتئاب، ورغم إن مشاعر المرارة في نهاية أي علاقة ممكن تتشخص طبيا بإنها "اكتئاب وقتي"، لكن المفروض إن ده مايستمرش أكتر من 6 شهور، وإلا هيكون اكتئاب بمعناه الواسع.

دي الأعراض اللي بترجح إن مشاعر ما بعد الانفصال بتسبب الاكتئاب

1- الإحساس باليأس والعجز الكامل

2- الفقدان أو الاكتساب المبالغ فيه للوزن، والتغيرات في الشهية

3- النوم فترات طويلة جدا أو فترات قصيرة جدا

4- فقدان الشغف وعدم الإحساس بالسعادة في أي حالة

5- الإحساس بانعدام القيمة والأهمية

6- التعب المستمر وفقدان النشاط والكسل الزايد

المتخصصين قالوا إن الشخص لازم يدي نفسه فرصة ومساحة للزعل قبل ما يتجاوز مشاعره ويـ Move on، وفي المرحلة دي حاجات زي العياط والغضب والإحباط مشاعر طبيعية جدا، لكن الطبيعي برضه إن المشاعر دي تقل تدريجيا أثناء تجاوز الشخص أزمة انتهاء العلاقة.

تأثير اكتئاب ما بعد البريك أب، ممتد لكل نواحي حياة الشخص المكتئب زيه زي مرض الاكتئاب، في دراسة في معهد علوم التربية الأمريكي، أكدت إن فشل علاقة عاطفية بيؤثر على صورة الشخص عن ذاته، وفي حالة طلبة الجامعة فهو بيؤثر على الطريقة اللي بيشوفوا بيها أداءهم الدراسي وقدرتهم على الإنجاز التركيز والتحصيل ودرجاتهم في الامتحانات.

"اكتئاب ما بعد الفركشة" ممكن مايكنش مصطلح طبي حقيقي، لكنه بالتأكيد حالة نفسية معروفة، وعشان تقدر تتعالج لازم توضح لدكتورك أو الأخصائي النفسي 3 حاجات أساسية: إنت حاسس بإيه بالظبط؟ بقالك قد إيه حاسس المشاعر دي؟ ومدى قوة أو صعوبة المشاعر عليك؟

طيب إمتى تخاف وتروح للدكتور فعلا؟ لما تبدأ تعاني أعراض الاكتئاب في أول 3 شهور من الانفصال، ولما الأعراض دي تكون أشد وأصعب من اللي تخيلتها وإنت بتخطط للانفصال أو وفي قت الانفصال نفسه ولما تطول معاك أكتر من 6 شهور بنفس القوة والشدة أو في وجود تحسن بسيط، الشيء المبشر في الموضوع، إن المشاعر دي بتعالج نفسها بنفسها في خلال 6 شهور والشخص بيكون أحسن مع الوقت وبالتدريج.

Comments: