٤ أسباب علمية بتؤكد إن الشتيمة مفيدة للجسم

28/11/2019

اتربينا من وإحنا صغيرين على إن الشتايم حاجة قبيحة وبتعبر عن إنك شخص مش متربي ولو ست الحبايب سمعتك بتشتم بتحس إنها ماربتش، مع إن الشتايم في كل حته حوالينا في الشارع والتلفزيون وكل الأماكن في البيئة المحيطة اللي ممكن الإنسان يتأثر بيها، لكن هي في الأول والآخر ممكن تسمعها بس غلط تقولها عشان عيب وعشان الناس ماتقولش عليك مش متربي ولأسباب كتير حطها المجتمع في دماغنا.

لكن الحقيقة إن فيه دكتورة اسمها إيما بيرن، عالمة كمبيوتر ومؤلفة كتاب "Swearing Is Good for you" قالت إن العالم كله اتعود على كده واتقاله إن الشتايم عيب وقالوا كمان إن الشخص اللي بيشتم هو شخص عدواني والناس بتاخد عنه فكرة سلبية، "بيرن" وضحت إن فيه فوايد كتيرة للشتايم وخصوصا للجسم، ومن ضمنها:

1- الشتايم بتقلل من إحساسك بالألم الجسدي:

فيه دراسة اتعملت سنة 2009 في جامعة "كيلي" في بريطانيا وطلبوا من المشاركين في البحث إنهم يغرقوا في مياه باردة، ولقوا إن المشاركين لما كانوا بيشتموا وهما بيغرقوا ده كان بيخليهم ويفضلوا صامدين مدة أطول من الأشخاص اللي كانوا بيقولوا كلام محايد وعادي ده غير إنهم ماكنوش بيحسوا بألم كبير كمان مقارنة بالمحايدين، وإنهم كل ما كانوا بيشتموا ماكنوش بيحسوا بالوجع زي ما قالت بيرن.

وقالت إنها بنت نظريتها على إن الشتايم بتحفز استجابة القتال وبترفع معدل ضربات القلب وبتضخ الأدرينالين وده اللي بيخلينا نتحمل الألم أكتر.

2- الشتايم في الوقت المناسب ممكن تخفف التوتر:

ساعات لما بنسأل حد إيه رأيك في المهمة الصعبة اللي إنت داخل عليها دي بيبقى عايز يشتم، إيما بيرن أكدت إن لما تحط الناس في مواقف متعبة ومرهقة وتقولهم ماينفعش تشتموا ده بيخلى أدائهم يقل وبيحسوا بإجهاد أكتر، وضربت مثال على الأبحاث اللي اتعملت على الطيارين والجراحين وقالت إن الكباين أو أوض العمليات اللي سمحوا فيها للطيارين والدكاترة إنهم يشتموا بعد عملية صعبة أو إقلاع أو هبوط صعب خلاهم يبقوا قادرين يتعافوا أسرع مقارنة بالدكاترة الطيارين اللي ماكنش مسموحلهم يشتموا.

3- استخدام الشتايم ممكن يخليك قادر تتغلب على المشكلات الصحية:

إيما بيرن بتقول إن بالنسبة للناس اللي بيعانوا من أمراض مزمنة أو خطيرة زي السرطان فالشتايم مفيدة فعلا ليهم في الناحية اللي بتتعلق بعواطفهم، وضربت مثال على مرضى السرطان وخصوصا الرجالة الناجين من سرطان الخصية، وقالت إن الشتايم كانت أنسب وسيلة قدروا يعبروا بيها عن الحزن والتعب والفقد والخسارة، وإنهم قدروا يعيطوا ويعترفوا بخوفهم من غير ما يحسوا إن ده أثر على ذكورتهم.

4- الناس في الجيم لما بيشتموا بيساعدهم يبقوا أقوى جسديا:

الباحثين قالوا إن الناس في الجيم بيبذلوا مجهود جسدي متعب جدا فلو شتموا وهما بيعملوا المجهود البدني المتعب ده بيستحملوا أكتر وبيلعبوا أحسن، وأكدت إيما بيرن وقالت إن الشتايم أثناء لعب الرياضة بتزود من مرونة الجسم وقوته مؤقتا، وجرب الموضوع ده بنفسك، وقالت كمان لو لقيت نفسك عايز تشيل حاجة تقيلة عليك استحضر قوتك الجسدية واشتم وحاول تشيل.

Comments: