عروض وخصومات وهمية.. إزاي تتجنب خدع البلاك فرايداي؟

29/11/2019

موسم البلاك فرايداي بقى يسبب حالة من الهيستيريا في عملية الشراء، أحيانا ممكن تشتري حاجة مش محتاجها أو مش هتحتاجها حتى قدام لمجرد إن سعرها نازل أو إن مكتوب عليها Hot Offer، أو تاج مكتوب عليها سعرها القديم وسعرها بعد الخصم، الكيانات الاقتصادية الكبيرة والمؤسسات الرأسمالية زي ما بتخلق احتياجات جديدة ووهمية عند المستهلك، بقت تخلق شكل من أشكال الإغراء للشراء، وتحقيق حالة من الرضا النفسي عند الشخص لما يشتري حاجة تمنها ألف جنيه، بـ 500 جنيه بس، كل ده ممكن يكون معروف، لكن هل المنتج تمنه ألف جنيه فعلا وإنت اشتريته بـ 500 بس؟ غالبا لأ.

في بريطانيا، مؤسسة Wich غير الهادفة للربح، والمتخصصة في مساعدة المستهلكين على تحقيق تجارب شراء أفضل سواء على مستوى الأسعار أو جودة المنتجات، عملت دراسة عن أسعار 83 منتج بمناسبة البلاك فرايداي 2018، الدراسة استهدفت رصد التغير في أسعار الـ 83 منتج خلال سنة كاملة، قبل البلاك فرايداي بـ 6 شهور، وأثناء البلاك فرايدي، وبعد البلاك فرايداي بـ 6 شهور، المفاجأة إن 95% من المنتجات اللي في الدراسة، اكتشفوا إنها متاحة بنفس السعر بعد البلاك فرايداي بـ 6 شهور كاملة، وبعض المنتجات بتكون أرخص كمان بعد انتهاء الموسم.

المنظمة قالت في الدراسة اللي نقلتها صحيفة "جارديان" البريطانية، إن 61% من المنتجات، كانت معروضة بنفس الأسعار من قبل البلاك فرايداي بـ 6 شهور، يعني مفيش أي خصم أو تخفيض، هي معروضة بنفس السعر لكن جنبها مكتوب Black Friday Offer، والمستهلك اللي مش عارف سعر المنتج كويس غالبا بيتخدع وبيشتري الحاجة على إنها رخيصة، رغم إنها في الحقيقة بنفس السعر، كل اللي بياخده بس من التجربة، الزحمة المبالغ فيها والطوابير على الكاشير والجري ورا المنتجات على الفاضي.

"ذا جلوكال" بتقدم لك بعض النصايح عشان تقدر تتسوق في البلاك فرايدي بشكل أكتر فعالية، وعشان تتجنب خداع المؤسسات الاقتصادية الكبيرة:

1- شوف سعر المنتج في أكتر من مكان:

 يعني لو لقيت عرض على التلاجة في مكان ما، شوف سعر نفس التلاجة في أكتر من مكان تاني عشان تتأكد إنه عرض فعلا، وإن ده مش سعر السوق، أو السعر اللي الشركة مصنعة التلاجة محدداه

2- شوف تاريخ السعر

لو قدامك عرض على ماكينة قهوة بـ 3 آلاف جنيه، شوف سعرها خلال سنة كان كام، بعض الأماكن بتلجأ لخدعة إنها تكتب أسعار وهمية عشان تخدعك بالتخفيض، يعني تكتب على ماكينة القهوة إنها كانت بـ 4 آلاف ودلوقتي بـ 3 آلاف، رغم إنها الـ 3 آلاف ده سعرها الحقيقي والمعروضة بيه من أكتر من سنة.

3- ركز مع الكاش باك

مواقع كتيرة بتديك تجربة التسوق مع أوبشن الكاش باك، يعني مع شراء كل منتج بتاخد نقط تقدر تستبدلها بفلوس، أو بمنتجات تانية، وده بيضمن لك خساير أقل في حالة إنك اشتريت حاجة أي كلام

4- التقسيط بدون فوايد

أثناء البلاك فرايداي، بيبقى في عروض -وغالبا على الأجهزة- إنك تشتري بالتقسيط مع بنك ما بدون فوايد، استخدم الـ Debit Card أو أي كارت ليك مع البنك، في إنك تشتري الحاجة على 6 شهور وإنت بتدفع جزء من المبلغ كل شهر من غير ما تمن المنتج يزيد عليك مع الفوايد

5- اشتري احتياجاتك

ماتشتريش لمجرد إن المنتج سعره مغري، حدد درجة احتياجك ليه لأنك لو اشتريت حاجة مش محتاجها أوي، فإنت دفعت فلوس مكنش مفروض تتدفع، مقابل حاجة مش هتفيدك أوي، وغيابها مش هيأثر فيك

6- الضمان وما بعد البيع

المنتج الرخيص مغري، لكن ماتشتريش حاجة سعرها قليل وإنت مش واثق في ضمانها وصيانتها وخدمة ما بعد البيع، اللي بنفس أهمية المنتج تقريبا، الحاجة اللي جبتها لو عطلت أو احتاجت صيانة ومالقتهاش، هتترمي في الزبالة

Comments: