أونلاين Girlfriend.. مواقع بتخليك ترتبط على الإنترنت بمقابل مادي

01/12/2019

أونلاين Girlfriend.. مواقع بتخليك ترتبط على الإنترنت بمقابل مادي

لو ماستخدمتش موقع أو أبلكيشن للتعارف والـ Dating يبقى أكيد سمعت عنهم ولو لمرة، والمواقع دي بتبقى فايدتها إنك تدور على شريك ليك أو تصاحب عادي يعني، بس حاليا العالم اتطور زيادة وبقى فيه مواقع مهمتها إنها تشغل بنات شغلانة جديدة هتبقى غالبا أول مرة تسمع عنها اسمها "Online Girlfriend" ممكن ده يبقى غريب ومريب وتحس إنه شئ سيء جدا أول ما تسمع عنه بس استنى اعرف تفاصيل أكتر عن الموضوع.

أكيد أول حاجة جت في دماغك هي شغلانة حورية فرغلى في فيلم "كلمني شكراً" أو شغلانة اشحنلي بـ10 وهفتح كاميرا، وبالرغم إن فعلا لسه فيه خدمات زي دي موجودة على الإنترنت لحد دلوقتي، لكن مش هي دي الشغلانة، الشغلانة إنك بالظبط كده "حبيبة أو صديقة" على الإنترنت.

شغلانة الـ "Online Girlfriend" هي شغلانة من البيت على الإنترنت عادي جدا، الشغلانة بتبقى معتمدة أكتر على المغازلة أو "الفليرتيشين" وحل المشكلات العاطفية والشخصية أو تبقى مجرد صديق او صديقة وممكن يبقى فيه تطور عن طريق إنك تبعت مقاطع فيديو أو صور لصديقك ده.

وبالنسبة لطريقة الدفع فالمستخدم المفروض إنه بيعمل اشتراك أو بيدفع أول بأول بعد كل محادثة، والمبلغ بيروح للبنت اللي بتكلمه وطبعا السعر بيبقى على حسب المكالمة ومدة المكالمة اللي بيقضيها المستخدم مع البنت اللي بتتكلم معاه، وده بييقى على حسب الموقع فيه مواقع بتحدد سعر لكل دقيقة ومواقع تانية بتبقى بالمكالمة، وفيه ستات عملوا حوالي 40 ألف دولار في السنة من المواقع دي.

وطريقة المواقع بقى بتختلف في الشغل يعني فيه موقع بيحدد إن لازم عمر البنت مايقلش عن 25 سنة والدقيقة بتكون بـ 0.20 دولار وأوقات الشغل بتكون مرنة جدا وقت ما تبقى البنت فاضية بتقول وتستني الرسايل اللي بتجيلها عشان ترد عليها، لكن الشرط هو إنها ترد على 75 رسالة في الأسبوع.

وفيه نوع تاني من المواقع بيسمح بالمكالمات الهاتفية بس ماتكونش فيديو كول إلا لو البنت شافت إن ده مريح بالنسبة لها أكتر، وبرضه فيها أوقات عمل مرنة، وفيه مواقع تانية بتعتمد أكتر على إن الستات تعبت صورها في رسايل وبرضه لو الست مش حابه ده مابتعملهوش بس الرسايل العادية تبقى قصيرة وبيكون فيها زي جدول ثابت بين البنت والمستخدم وأهم حاجة البنت تبقى عمرها أكبر من 18 سنة.

من أشهر المواقع في المجال ده Flirtbucks و Phrendly و Dream lover وممكن تشتغل في المواقع دي بدوام كامل أو ممكن تبقى Freelance على حسب اختيارها والوقت الفاضي اللي عندها.

Comments: