بمناسبة 20 سنة على تأسيسها.. "معت" هتنظم فعاليات للاحتفال بالرقص المعاصر لحد 21 ديسمبر

05/12/2019

"معت" للفن المعاصر هتنظم فعاليات للاحتفال بالرقص بمناسبة مرور 20 سنة على تأسیسها من خلال مهرجان "20 سنة معت"، واللي هيتعمل في أماكن كتيرة في القاهرة في الفترة من 7 لـ 21 ديسمبر الجاري.

الاحتفالية هتشمل أنواع مختلفة من الفعاليات، زي عروض الرقص وحصص الرقص والندوات، بهدف الاحتفال بكل أشكال الرقص وإتاحة برامج وأنشطة "معت" للفن المعاصر لجمهور أوسع خلال أيام الفعاليات.

العروض هتتعمل على مسرح الفلكي، بواقع عرض كل يوم بتبدأ يوم 8 ديسمبر، وبتستمر أيام 9 و10 و11 و12 ديسمبر، في معاد ثابت الساعة 8 في كل الأيام، والتذاكر متاحة على موقع تيكتس مارشيه من هنا.

وعموما "معت" مشروع وفرقة مصرية بالكامل، مكونة من راقصين متخصصين عندهم الخبرة ودرسوا بشكل علمي، وخرجت الفرقة أجيال كتيرة، من أول ما أسست "معت" أول فرقة رقص معاصر مستقلة سنة 1999، وكانت من البداية نواة لمشروع بيدعم الفن المعاصر بشكل عام، والرقص المعاصر بشكل خاص. 

وأنتجت "معت" للفن المعاصر من خلال الفرقة، أكتر من 20 عرض لحد دلوقتي من إخراج كريمة منصور، شاركت بيهم في فعاليات مختلفة حول العالم، كما وشاركت كمان في أكتر من 20 تعاون مسرحي وسينمائي، ده غير إنتاج أكتر من 25 عرض لمخرجين شباب مصريين وأجانب.

ومن بدايتها، قررت "معت" يكون ليها دور تعليمي وثقافي مهم، عن طريق تدريس فنون الرقص المعاصر في شكل أنشطة وورش مستقلة وبالشراكة مع كيانات ومؤسسات كبيرة مستقلة وحكومية.

وفي 2018، خلال فاعلية "إعادة إطلاق معت"، قدمت الفرقة عروض شارك فيها طلاب وخريجين "معت| مدرسة الرقص المعاصر"، واللي درسوا مناهج مصرية 100% من غير استعانة بعارضين أجانب أو هواة.

ومع الوقت، اتطورت "معت" أكتر وبقى عندها برامج وأنشطة كتيرة ومتنوعة، منها مدرسة بتقدم برنامج مدته ٣ سنين، ده غير برنامج حصص مفتوحة، وبرنامج إقامات فنية بيدعم فنانين مصريين وعالميين، وبرنامج توعية واتصال خاص بالأطفال الأقل حظاً على المستوى الاجتماعي، وبعد ما ثبتت "معت" أقدامها، حققت شراكات وتعاون مع مدرسين وطلبة وخريجين المدرسة، واتوسعت في أنشطتها الإنتاجية لفرق تانية.

Comments: