عفاف شعيب عن حلا شيحة: "لبستي الحجاب ليه؟ كنتي بترضي عريس جديد؟"

02/12/2019

في الفترة الأخيرة بدأت كذا فنانة كانت اعتزلت التمثيل بسبب الحجاب إنها تخلع الحجاب، فيه منهم اللي خلعت الحجاب ورجعت للتمثيل وفيه منهم اللي خلعته بس، وبرضه فيه فنانات لسه متمسكين بحجابهم زي الفنانة عفاف شعيب كده.

ظهرت الفنانة عفاف شعيب في برنامج "تحيا الستات" مع الإعلامية راغدة شلهوب اللي بيتعرض على قناة النهار، في حلقة اتذاعت يوم الجمعة اللي فات 29 نوفمبر ولما عرضت عليها الإعلامية راغدة شلهوب صور للفنانة شهيرة وسهير رمزي بعد ما خلعوا الحجاب، والناس اتكلمت عليهم على السوشيال ميديا وسألتها عن موقفها من خلعهم للحجاب، قالت إنها زعلت واتضايقت لإن الفنانتين بقالهم 27 سنة لابسين الحجاب، وقالت "بعد 27 سنة بتقلعوا ليه؟"، وأضافت "كل واحد حر، أنا ماعرفش هما قلعوا الحجاب، والناس كانت حاباهم بيه، والاتنين حلوين"، وقالت كمان إنها ماتعرفش ليه طلعت في دماغهم "بس أكيد حد وسوسلهم".

ومن هنا الكلام جاب بعضه وسألتها راغدة شلهوب عن حلا شيحة وقالتلها "لما حلا شيحة قلعت الحجاب كان مقبول أكتر"، وردت الفنانة عفاف شعيب "والله مش مقبول، طاب لبستيه ليه؟ إن اللي بتلبس الحجاب بتقي مقتنعة بيه؟ ولا مش مقتنعه بيه؟ ولا هو بس منظر؟ ولا عشان إرضاءً لعريس جديد جايلها وقالها اتحجبي؟".

وقالت بعد كده إنها مش بتقول على حلا وإنها بتقول على أي حد يا تلبس الحجاب وهي مقتنعة إنه فرض من فروض ربنا يا ماتلبسهوش، وأضافت كمان إن في الفترة لما فنانات كتير لبسوا الحجاب انتشرت إشاعات إنهم واخدين فلوس عشان يلبسوه.

وكملت عفاف شعيب كلامها "الناس كانوا بيكلموني كأن أنا اللي خلعت الحجاب عشان أقنعهم وأرجعهم، أنا قابلتهم فعلا بس ماقدرتش أقولهم عشان كل واحد حر".

وأضافت "حلا شيحة؟ ربنا يردها ردا جميلا، ووهي ماشي خلعت الحجاب بس مفروض بقى تلتزم باللبس بتاعها لإنها داقت طعم الطاعة وداقت يعني إيه التزام وعرفت، فياريت  تلتزم بحدود معينة وماينفعش تقلع كده مرة واحدة".

ووضحت أكتر إنها ماقلبتش حلا ولا كلمتها لكنها سمعت بس إنها بقت على النقيض من اللي كانت فيه وإنها لو حتى شافتها مش هتكلمها لإنها حرة، وإنها ماتقدرش تفرض على حد حاجة.

وقالت كمان إنها عمرها ما دعت حد يلبس الحجاب عشان كل واحد حر، بقالها 27 سنة ماقلتش لحد، ولكن فيه ناس كانوا بيفتروا عليها ويقولوا إنها قالت لهم يتحجبوا أو يتنقبوا "الناس كدابين أنا ولا اتناقشت معاهم أصلا، أنا اتحجبت عن قناعة وعن رضا من ربنا وبعد استخارة وبعد رؤية من أخويا الله يرحمه وعرفت إنها رسالة عشان تلبس الحجاب، ودلوقتي لو دفعوا لها مليارات مش هتقلعه".

Comments: