"الحسن".. مؤسسة مصرية لدعم مصابي العمود فقري: أهلت 10 أبطال لأولمبياد طوكيو

03/12/2019

كتير من المنظمات والمؤسسات بيساعدوا الناس خصوصا لو كان عندهم حاجة بيعانوا منها بس منظمات قليلة جدا اللي فكرت تساعد مصابي العمود الفقري، مؤسسة "الحسن" هي واحدة من المنظمات اللي بتعمل ده بتدعم وبتأهل مصابي العمود الفقري، وهي المؤسسة التنموية الوحيدة في مصر والوطن العربي المتخصصة في خدمة المستخدم الدائم للكرسي المتحرك.

المؤسسة شعارها "نحن قادرون باختلاف" وأكتر من 50% من مجلس الأمناء 70% من موظفين المؤسسة أصحاب اختلافات جسدية، وبتخدم كل محافظات مصر وبتقدم 8 مشاريع أساسية هدفهم خدمة مستخدمين الكراسي المتحركة الدائمين سواء كان من تأهيل نفسي أو تأهيل وظيفى لحد ما يوصلوا للاستقلال الحركي ويعتمدوا على نفسهم بشكل كامل -على حسب اختلاف درجة الإصابة، وفي مشروع "انهض" تم تأهيل 3 آلاف شخص لحد دلوقتي.

من وقت انطلاق المؤسسة لحد دلوقتي تم توفير حوالى ألف كرسي متحرك في مشروع "كرسي بالمقاس" لإن مش أي كرسي بيكون مناسب لمصاب العمود الفقري، لإن الكراسي المتعارف عليها في المستشفيات لنقل المرضى ليها ضرر كبير على مستخدمها لو هيستخدمها بشكل دائم، فهي بتسبب تقوص في العمود الفقري وتقرحات وللأسف فيه حالات توفت بسببها لإن الكرسي لازم يتفصل بالمقاس وبيكون مصنوع من مواد بتجمع بين خفة الوزن والمتانة وبيكون له معاير معينة على حسب وزن وطول وإصابة الشخص، والمواصفات دي بتساعد الشخص يتحرك أسهل من لو استخدم كرسي عادي.

وفيه مشروع كمان خاص بالمؤسسة اسمه (الإتاحة للجميع) وهدفه رفع الوعي المجتمع لتغيير البنية التحتية في المواصلات والأماكن السياحية وغيرها عشان تبقى متاحة لكل مستخدمي الكراسي المتحركة، ومشروع (مصدر رزق) وهو هدفه تحقيق الاستقلال المادي عن طريق إنه يوفر لهم فرص عمل في وظايف وشركات أو يساعدهم إنهم يفتحوا مشاريع صغيرة واستفاد من المشروع ده 300 شخص ونسبة نجاحه وصلت حوالى 92%.

وطبعا كان لازم يكون فيه مشروع للأطفال وهو (أطفالنا على عجل) المشروع بيهدف للاهتمام بالأطفال وأهلهم اللي بيرعوهم وبيتم تأهيل الأطفال نفسيا ومعنويا وحركيا وبيوفر لهم كل الامكانيات المتاحة عشان يخرجوا الطاقة الإبداعية اللي جواهم واستفاد منه 500 طفل لحد دلوقتي.

أما مشروع (فنون ورياضة) فهدفه هو توفير مساحة للمستفيدين إنهم يخرجوا المواهب والطاقات الفنية والابداعية والرياضية عند كل مستخدمين الكراسي المتحركة، واستفاد من المشروع ده 500 شخص، ونتايجهم كانت مبهرة لإن المشروع ساهم في تطوير مهارات 10 من المستفيدين اللي قدروا يتأهلوا لأولمبياد طوكيو 2020، وفيه مستفيدين انتفعوا بكراسي بالمقاس وانضموا لفريق كرة السلة، ومن ضمن الأشخاص اللي اتأهلوا لأولمبياد طوكيو 2020 هما:

1- آية الله أيمن عباس:

السن: 19 سنة

المؤهل : طالبة بالسنة الثانية بالجامعة الامريكية

المحافظة: القاهرة

عدد الميداليات: أكتر من 75 ميدالية محلية وأكتر من 15 ميدالية دولية

الإصابة : عيب خلقى أثناء الولادة أدى إلى شلل نصفي

2- عمرو فاروق:

السن: 27

المؤهل:  بكالريوس صيدلة

المحافظة: الجيزة

عدد الميداليات: 17 محلية 4 دولية

الإصابة: شلل نصفى نتيجة الصلب المشقوق

الوظيفة: دكتور صيدلى

الرياضة : رفع أثقال

3-  الاسم: ملك حسين محمد:

السن: 17 سنة

المحافظة: القاهرة

المؤهل: طالبة

عدد الميداليات: 6 ميداليات دولية و 29 محلية

الإصابة: شلل نصفى ناتج عن حادث سيارة

الرياضة: سباحة

4- محمد ممدوح الديب:

السن: 40 سنة

المؤهل: ثانوية عامة

المحافظة: الغربية

عدد الميداليات: 27 ميدالية

الإصابة: بتر فوق الركبة

الوظيفة: إداري بشركة الخدمات المتطورة للبترول

الرياضة: رفع أثقال

Comments: