٨ علامات بتدل على الثقة القوية بينك وبين شريكك

04/12/2019

العلاقات لغز محير جدا بالنسبة لأي حد محدش عارف هي بتنجح على أي أساس أو بتفشل على أي أساس، الموضوع مش مفهوم بالنسبة لنا بس طلع له معايير علمية، خبير العلاقات " تيم لوت" قال إن العلاقات بتنجح على أساس 3 حاجات، وهما التواصل، الثقة، والاحترام وقال إن الثقة هي أصعب صفة ممكن تبقى موجودة في العلاقات، لكن أهم حاجة يبقى عندك إيمان وأمل في العلاقة لإن حتى لو كان فيه غلطات حصلت قبل كده في العلاقة فممكن تتصلح.

فيه علامات بتقول إن العلاقة دي فيها ثقة متبادلة بين الطرفين:

1- مش خايف تكون على راحتك أو تظهر زي ما إنت:

أكيد كلنا شوفنا نوع من العلاقات الطرفين بيكونوا مش على حقيقتهم طول ما هما مع بعض وبيمثلوا كأنهم ملايكة نزلوا من السما، وفقا للمعايير الاجتماعية، في العلاقات الطبيعية إنت بتكون زي ما إنت مابتخافش تظهر زي ما إنت بتبقى قاعد في البيت مع حد من أهلك عشان شريكك بيبقى فاهم إنك مش "روبوت" وإنك إنسان طبيعي، ممكن تاكل على السرير وتمشي في البيت زي ما إنت عايز وهتبقى عارف إن شريكك شايف إن دي حاجة طبيعية.

2- هتشارك معاه تفاصيل يومك زي ما هي:

لما هترجع البيت بعد يوم شغل طويل أو خروجة مع صحابك هتبقى عايز تتكلم معاه في تفاصيل يومك ومش هتتكسف تقوله إن زميلك في الشغل خلاك مش طايقه ولا طايق نفسك ولا طايق الشغل، لإن مشاركة التفاصيل بيطور الثقة والتوافق في العلاقات فلازم يبقى مش مجرد شريكك ويبقى صاحبك قبل أي حاجة تانية، وعلى حسب ما قالت الأبحاث فإنت كمان لازم تبقى مهتم إيه اللي بيحصل في حياة شريكك.

3- ممكن تتكلم معاه عن الحاجات اللي ضايقتك قبل كده:

ممكن كان يبقى عندك مشكلات قديمة حصلت مع أهلك وسببتلك مشاكل نفسية أو دخلت علاقة قبل كده وأذتك، لازم تقدر تتكلم عنها مع شريكك لإن الحاجات دي مش هتقدر تشاركها غير مع الشخص اللي بتثق فيه، وبيقولوا المتخصصين إن من المهم إنك تفصل بين الماضي والحاضر وإنت بتسمع الكلام ده وماتقارنش شريك حياتك بأي شخص، لما تناقش تجاربك اللي قبل كده مع الشخص اللي بتثق فيه هتاخدوا مستوى أجدد في الثقة مع بعض، بس أهم حاجة تبقى صريح فعلا وتاخد بالك أحسن تأذي مشاعر حد تاني.

4- عارفين أرقام حساب بعض البنكية والـ Passwords بتاعت حسابات بعض:

ممكن تبقى مشاركة الحسابات البنكية دي علامة كبيرة على الثقة بين الطرفين، ده غير إنهم بيبقوا قادرين يتكلموا عن المشاكل المادية ويلاقولها حلول وده له فوايد كتير في العلاقات.

5- مابتتحكموش في تصرفات بعض:

ممكن ضعف الثقة بين الطرفين يخلق مشاكل كبيرة خصوصا لو اتعودت تتحكم في شريكك وتبعت له أو تتصل به كل ساعة، ولو خدت مساحتك الشخصية ومارضيتش تخليه يشوف موبايلك هيشك إن بتخونه وده بيدل على إن مفيش ثقة، ده غير إنك لما تسمح لشريكك يشم نفسه فده مش معناه إنك بتخليه هو بس اللي مستقر فإنت كمان كده مستقر، وإنتوا كده واثقين في بعض.

6- ممكن بسهولة تخلي متعلقاتك مفتوحة:

السوشيال ميديا ليها دور كبير جدا إنها تساعد على الخناقات بين أي اتنين في علاقة ويمكن بتبقى من أسباب الفركشة أصلا، لكن تخيل كده شريكك بيسوق مثلا أو بتطبخ وبعدين طلبت منك تشوف المسدج اللي جات على الواتساب، لو كان ممكن تعمل كده مع شريكك فإنتوا كده ماعندكوش اللي تخبوه على بعض ودي مرحلة كبيرة من الثقة.

7- بتحس بالأمان حتى لما تشارك معاه مشاعرك السلبية مش الإيجابية بس:

كلنا بنعدي بأيام كل حاجة في اليوم بتبقى بايظة، لو كنت قادر تشارك ده مع شريكك فإنتوا كده بينكوا ثقة لإنك هتبقى اتغلبت على مخاوفك إنه ممكن يحكم عليك مثلا، وده بالتالي هينعكس عليكوا يعني لما تتخانقوا وتحس بأي مشاعر سيئة أو إهانة حتى هتعرف تتكلم معاه وتقوله ده ومش هتبقى عايز تسيبوا بعض عشان مش عارف تعبر وهتبقى عارف إن الإنفصال مش هو الحل وإنكوا ممكن تتكلموا مع بعض والعنصر ده مفيد أكتر بالنسبة للستات.

8- ممكن تعترفوا بغلطكوا لما تغلطوا أو تشاركوا بعض المسؤوليات:

فيه ثقة كبيرة بتتبني لما تشارك شريكك المسؤوليات العاطفية مش المنزلية بس أو اليومية بس، فلو بدأت تتعاطف معاه وتشاركه المسؤوليات، وكل واحد يعترف فيكوا إنه غلطان لما يغلط فدي علامة على إن العلاقة دي صحية، ومهم طبعا ماتلومش شريكك بعد كده على مشاعره.

Comments: