لو بتفكروا في الرجوع للإكس: 6 نصايح ممكن تنجح التجربة التانية

04/12/2019

الرجوع للـ ex شيء صعب ومرهق ومحتاج دراسة لكن أكيد مش مستحيل، أول فكرة بتيجي في بالك إن إزاي نرجع وإحنا معرفناش نتفاهم في علاقتنا من أول مرة، لكن الشيء المبشر إن مكونات شخصية البني آدم بتتغير مع الوقت والسن والخبرة وبتطور طرق التفكير والطباع.

الصحاب دايما هما أول ناس بيكونوا ضد فكرة رجوعك للإكس، ممكن من باب الخوف على صاحبهم أو من باب إن شايفين حاجة الشخص نفسه مش شايفها، عموما مش كل التجارب بتبقى زي بعضها، ساعات رجوعك للإكس ممكن يخلق علاقة مثالية بعد ما تبقوا عرفتوا قيمة بعض، وممكن يبقى مأساة، لكن في شوية نصايح ممكن تخلوا بالكم منها لو قررتوا ترجعوا للإكس تاني. 
 

1- أول وأهم خطوة هو عدم الاستعجال علشان الشعور بالندم اللي ممكن يجيلك لو رجعتوا، هيرجعكوا تاني مكان ما بدأتوا

2- اعملوا جدول، وشوفوا هتقدروا تتغلبوا على العيوب اللي كانت فيكم وسببت المشاكل ولا لأ.

3- لو حسيتوا إن طباعكم ماتغيرتش بلاش تضييع وقت، كفاية ساعتها تحسوا بالرضا إنكم خدتوا فرصة تانية كان ممكن تندموا من غيرها

4- ابعدوا عن أي حد يأثر على تفكيركم، امشوا ورا اللي حاسين بيه عشان دي حياتكم إنتوا

5- عند بعض الناس بيكون الشعور بالحذر واخد حيز كبير وكأن طرف واقف للتاني على الواحدة، خلوا الأمور تمشوا بسلاسة إنتوا مش أعداء، إنتوا بتحاولوا تنجحوا العلاقة 

6- النوع التاني من الناس بتبقى "السكينة سارقاه"، التوهان في شعور السعادة إنكم رجعتوا لبعض تاني ممكن يخليكوا تتغاضوا عن مشاكل كبيرة هتكبر

Comments: